立場新聞 Stand News

我真係唔覺得有「童真」喎!

2015/7/17 — 17:45

死啦,我真係唔覺得有「童真」喎!先從網上流傳嗰幾張封面同內頁相(唔係最具爭議嗰幾張),再從女童嘅打扮、posture、衣著、攝影角度等,都予人感覺根本係將女童拍成係大人(或少女)咁樣,邊度係童真呢?對我嚟講,童真都唔「萌」得晒,有時仲幾乞人憎,尤其係佢哋喺餐廳大力用刀叉不停咁「亨」啲碗碟、或者「懶老積」嗰陣!所以,只呈現童真所謂「萌」嘅一面時,已經係選擇性嘅童真;況且,我真係覺得相中嘅唔係女童,係細路扮大人。

點解我會有咁嘅感覺,或就另外幾張「擘脾」相,點解會有人覺得意淫,就當然唔單只係睇嗰個(viewer)嘅問題;張相點影、揀邊啲相、同張相嘅上文下理都好有關係啦。講到呢度,又點可以唔提 Roland Barthes 呢?佢就係話張相點影、用乜角度、用乜顏色、如何對焦等,會令讀者產生某種情緒或情感嘅反應(connotation);而相中所呈現嘅影像(例如一㗎 Porsche),會令人連繫到某個 mental concept(「Porsche 汽車」這概念),但呢個 concept 又可能會引發一連串嘅聯想(富貴、才俊、溝死女等),呢啲聯想,Barthes 稱之為 myth。Connotation 同 myth 呢兩款嘢,就係佢所講嘅「second order of signification of a sign」(唔識譯!)

廣告

我冇睇過成本寫真,但單憑網上流傳嗰六、七張,睇到女童好似有化淡妝,衣著 casual,有時都幾「街坊」(我細個都試過著條底褲落街買嘢);拍攝角度、打燈/採光、景深、對焦,整體構圖、相片揀選等,都似係突顯女童嘅身體(vs 女童與環境嘅關係等),甚至係身體上某些地方(如咀角嘅雪糕)。呢種影法,首先會令人產生「得意」嘅情緒/情感反應(除令人覺得陽光/開朗/舒服外,我諗都會令人覺得有啲怪怪的,覺得硬係唔太自然,會問點解咁影)(connotation)。而呢啲畫面除令人連繫到「女童」呢個概念外,仲會聯想到日本嘅少女寫真甚至 AV(myth)。當然,冇睇過日本少女寫真或 AV 嘅人,應該唔會有咁嘅聯想,但我諗香港嘅男士 10 個之中都起碼有 6 個睇過啩?!當男人佔人口50%,即全港都有 30 % 人睇過,都好 significant 啦。你或者冇睇過,但影相個攝影師實有喇啩!唔好話俾我聽你揀相嗰陣,真係連一啲呢方面嘅聯相都冇哇。

仲有呀,Roland Barthes 話最 erotic 嘅,唔係你睇到嘅嘢,而係喺你睇唔到,但係喺你睇到嘅夾縫中「飛出嚟」嗰啲(如女士嘅爆鈕恤衫,你係睇唔到個胸,但......你懂的)。

廣告

所以,睇者心邪,絕對唔怪得晒睇者,拍嗰個絕對有份構成呢種心邪。而我諗,跟川島小鳥嘅作品嘅分別,就正正係作品所引發嘅 connotation 同 myth。

至於個阿媽係咪存心賣女?就算唔係,都一定有疏忽!經理人有 artist 接拍 print ad,都一定要揀過相同 prior approval 至可以俾廣告出街啦;作為阿媽,竟然睇都唔睇就俾人將個女啲相攞嚟賣?唔係化?

發表意見