立場新聞 Stand News

扑嘢啫,唔使要層樓咁誇張呀!

2016/10/9 — 17:17

相:hkoasis.com

相:hkoasis.com

尊貴嘅游蕙禎議員一句:「就算我哋而家想去扑嘢,都搵唔到房去扑。」語驚四座,有人為佢喝彩叫好,我就R爆頭,仆嘢啫,使乜要租樓或買樓咁誇張呀,唔可以去「維多利亞」或者「百佳」咩。

唔知係咪游議員試過去時鐘酒店爆房,但間酒店真係爆晒房,所以佢先發晦氣話買唔起或租唔起樓冇得扑嘢。如果係咁,佢應該倡議政府起啲時鐘酒店俾港人,若然係年青人光顧,更可以打個7折,咁咪解決問題囉。

時鐘酒店有商機

廣告

上面都係講笑,但講開時鐘酒店,確係一門賺錢生意,唔信,大家可以計計數,以香港維多利亞每兩粒鐘收費計,約莫300幾蚊,一日廿四個鐘,若全數租出,一間房收四千幾銀,可以媲美五星級酒店;但唔好忘記佢哋裝修好普通,位置又唔係大街大巷啲靚位,冇大堂兼夾冇設施,除咗多咗啲安全用品俾你之外,成本遠較五星級酒店低。

唔係講笑,呢啲時鐘酒店隨時出租率超過一百,點解,我又講吓個故事,幾年前Loser曾經聽過大陸某家經濟酒店(Budget Hotel)管理層講,佢哋啲酒店出租率超過一百,當時我好奇怪問點解,佢話有時啲人入去沖個涼就走。

廣告

我初初諗點會有人淨係沖個涼咁奇怪,後尾諗通咗,啲大陸人租嚟爆房,用幾個鐘就走,酒店可以騰空個房再出租,結果出租率咪可以好勁。同樣道理,有啲時鐘酒店嘅情侶可能租用唔到兩個小時,出租率有機會更高,所以話時鐘酒店絕對有得做。

Love Hotel Reit

有做基金朋友話,將呢啲時鐘酒店打包成為一個地產投資信託基金,即係以reit模式上市,係有一定市場。日本有好多情趣酒店,其實跟香港啲時鐘酒店差唔多,只不過日本仔好搞嘢,懂得花好多心思同創意,將啲酒店裝修到好多不同款式,好似火車,山洞或太空咁,等啲情侶有唔同感覺。

當地曾經就有基金叫Global Financial Support,大手投資呢啲情趣酒店,帶來嘅利潤都唔錯。

游議員扑唔到嘢而啟發到啲人去搞時鐘酒店,甚至做個Love Hotel Reit上市,隨時可以為香港帶來商機,抵俾個like佢。

發表意見