立場新聞 Stand News

打工仔嘅心願 — 加人工

2018/12/21 — 19:08

建築工人(資料圖片,來源:政府新聞處)

建築工人(資料圖片,來源:政府新聞處)

又到年尾喇喎,咁大家諗唔諗到咩嘢係打工仔嘅願望呀?

咁當然就係加人工啦,每年職工盟都會有加薪幅度嘅建議,咁今年我哋就建議應該大約 5.5% 左右,大家聽到 5.5% 可能會嚇了一跳。有啲人會話呢個數目咁多,但其實又有好多打工仔女自己都識得講至少要 7 至 8% 先夠添。

我哋建議嘅加薪幅度係有根有據㗎!

廣告

最主要嘅原因係因為經濟有所增長,我哋嘅數字都係嚟自政府統計處㗎!其實去到第三季嘅經濟按年實質增長都有 2.9%。所以大家應該咁諗,正正因為大家都有努力工作,生產力先可以有增長,咁僱主自然應該同僱員分享返成果,將部分盈利俾我哋作為加薪之用都好合情合理。

嗱!再講吓啲大企業嘅詳細情況,老牌銀行好似恆生,去到六月呢半年佢哋都賺咗 126 億,我哋熟悉嘅新鴻基地產到六月頭半年都賺咗 499 億,公共事業煤氣頭半年都賺咗 47.9億,我哋成日鬧佢趕絕小商戶嘅領展到 3 月全年嚟講都賺咗 53 億,大快活到 3 月全年嚟講都賺咗 2.2 億,其實各行各業都係賺錢,仲要真係「億億聲」㗎!

廣告

當然有人成日話乜乜乜中美貿易戰,都係借口,啲高層、老細想將全部盈利袋落自己袋啫。可能大家都又會諗係咪得呢幾間大企業先賺到錢呢?其實又唔係喎!實質我們十年嚟都做咗啲統計,每個打工仔女加不加到人工、行業生產力係點……我哋發現好似批發、零售、金融保險等行業嘅人工唔單止無加,仲要減咗由 0.1 %到 1.9% 不等,真係捱就有佢哋份,但有賺嘅時候就……

仲有呀!依家僱主成日話想輸入外勞,如果真係輸入外勞,要記住可能係輸入一啲低薪、被剝削嘅外勞,咁嘅話,越嚟越少本地勞工被聘用,本地人嘅飯碗終有一天可能會不保!

無論如何,有能力嘅僱主同醒目嘅打工仔女都要識得嗌價,爭取到 5.5% 啦!

 

作者 Facebook

發表意見