立場新聞 Stand News

打工仔女對財政預算案的期望

2019/2/27 — 10:10

資料圖片(來源:政府新聞處)

資料圖片(來源:政府新聞處)

一年一度嘅財政預算案即將出爐,財爺就話保就業穩經濟,職工盟就認為應該投放適量嘅資源重新啟動標準工時立法的預備工作。既然政府已經為 11 個行業設立行業委員會去做所謂嘅工時指引,指引不單沒有法律上的約束力、更消耗政府不少嘅資源咁樣分散去傾,不如政府可以集中人手起來主力研究立法各方面的預備功夫。按瑞士銀行 UBS 2016 的調查顯示,香港工人平均工時逾 50 小時,名列全球之冠,情況非常嚴峻。一些同民生息息相關嘅行業:例如職業司機包括巴士車長等等,一路以來就係因為工時太長、終於近年導致意外頻生。

另外一點就係「保就業」嘅其中一個重點:關於取消強積金對沖嘅安排。好多工友成日聽到「取消強積金對沖」以為盡快生效,仲以為由生效當天就唔使畀人對沖。令人有個錯覺以為即使劃線自己未必有所損失,但係事實正正相反,畫線之後就真係不可以對沖,但係畫線之前所有嘅遣散費或長期服務金將不被計算仍然可以被對沖。既然政府準備動用 300 億去補貼僱主支付劃線後的遣散費或者長期服務金,那麼就應該同樣公平對待所有打工仔女因劃線之前仍然有機會損失的遣散費或者長期服務金。須知道年紀越大、但係又越嚟越接近法例生效日期即係畫線日嘅工友、佢哋面臨嘅損失就會更大,既然保就業就唔應該讓打工階層有重大損失啦。

而第三樣我哋希望政府要留意,堅尼系數過去幾年一直都屢創新高足以證明,即使有最低工資嘅立法其實現在物價攀升嘅程度已經遠遠超越最低工資嘅購買能力。工資中位數雖然到達 16,400 元但係又有幾多工友真係可以攞到 16,400 元去生活呢?政府係時候需要逐步引入生活工資才對,根據樂施會較早前嘅公佈適用於香港的生活工資大概為每小時 55 元左右。職工盟認為政府應該由自己做起引入生活工資,主動改善在職貧窮嘅問題。政府作為全香港最大僱主,並且使用大量的外判基層員工,應該作出更大承擔去保就業。政府應該主動於外判標書加入支付生活工資的條款做示範。這樣才令到公帑更用得其所,這帶頭作用特別對於政府外判基層員工、所有由公帑資助的公營機構的基層工友就更加有實際幫助。

廣告

最後,政府不應該以削減福利來迫老人家搵工打工,長者是否繼續工作應由他們自願選擇,政府應該重新考慮實施全民退休保障,想穩定經濟就必須要有一個穩定嘅社會。令勞碌大半生貢獻社會的老人家可以安享晚年。

 

廣告

(本文內容見於 2 月 25 日香港電台節目《左右紅藍綠》

作者 Facebook

發表意見