立場新聞 Stand News

打打氣

2016/4/12 — 21:28

作者配圖

作者配圖

噚日收到一位網友留言,要求我幫佢個考緊DSE嘅外甥仔打打氣。除咗運動比賽項目,場邊打氣刺激腎上腺,直接影響表現,從未試過幫陌生學生哥打氣,因為覺得無乜用,阿媽係女人嘅鼓勵說話,個個聽過九萬幾次,除非老豆老母屋企人自己友關心,社會上所謂成功人士噏嘅嘢,對班後生仔嚟講,邊有說服力,點會聽得入耳。

但網友越洋求助,關心之情溢於言表,外甥仔仲係現屆安柱中學師弟,話係我粉絲,曾經聽過我演講,咁就破例一次,無用就無用一次啦。

*******

廣告

XX師弟,

讀安柱,係我人生最重要、最快樂、最回味無窮嘅日子,希望你好好珍惜,唔好畀讀書考試嘅壓力影響咁大。

廣告

考試當然重要,除咗用功投入,通常邊個識得管理時間同埋應付壓力,成績就會好啲。而用功讀書嘅方法,人人唔同,我就會繼續打籃球、讀課外書、盆栽種植,分散注意力,保持冷靜同埋作戰能力,希望你都培養到自己嘅風格習慣,千祈唔好人云亦云,五時花六時變。

人生係一條長途競賽,有高有低,有贏有輸,有人鍾意鬥快,有人鍾意留前鬥後,我就鍾意均速平平穩穩,總之要明白,自己嘅人生,自己負全責,外人可以畀少少意見,提供若干協助,但始終靠自己完成任務,平常心面對每一次考驗,經歷過後,就會發現,好多嘢不外如是,原來自己嚇自己,反而影響表現。

祝福你快樂,其實做人仲有乜嘢重要得過健康快樂。

後記:

如果師弟仔睇到呢篇文,四月二十四日晏晝得閒,可以嚟齋問齋答座談會,扮我書僮入場,畀你帶個女伴,問一條問題,算係我哋嘅緣份。

如果其他DSE學生睇到呢篇文,打氣可能已經太遲,希望你哋鼓其餘勇,善用時間,勇敢面對困難。

今日工作滿懷心事,如果同事睇到呢篇文,一定要記住,好多人關心,家人永遠重要過工作,世界總要向前。

 

作者facebook

發表意見