立場新聞 Stand News

打歪攻略 — 一句 KO 政府歪理難度排行榜

2018/12/1 — 18:48

Now 新聞影片截圖

Now 新聞影片截圖

為捍衛市民利益,我哋嘅研究員經常四出決戰官商鄉黑。要做到一句 KO 政府權貴嘅歪理同大話,難度幾高又有幾多人知呢?

Level 1:對付歪理要做足功課,比對手更加熟書。
(難度分析:因為大部分對手都唔做功課,所以其實唔難。)

Level 2:香港啲歪理 fake news 日日新鮮,跟都跟唔切。
(難度分析:咁就要搵到班志同道合嘅人一齊傾同即時 fact check,就會做到即日 KO 嘅效果,靠自己做獨力難支。)

廣告

Level 3:歪理天天都多,我又應得幾多個?
(難度分析:咁就考你轉數快,平日有冇 keep 住捕捉政策論述走向,搵出突破歪理嘅關鍵缺口。)

Level 4:有時唔係冇人洞悉到個歪理,只係岸郊野唔賞鯉。
(難度分析:就呢一個 moment,研究員要坦然接受「你唔堅持呢刻講出事實,世界就唔會有人講」嘅絕望真相。)

廣告

Level 5:道理係人都明,但就唔係人人都講得明。
(難度分析:研究員要開始學會將複雜道理講得易明之餘,又不失嚴謹性(engage simplicity),唔係咁易㗎葉師傅。)

Level 6:其實道理真係唔係人人都明,但道理講一次係新聞、第二次就係長氣。
(難度分析:咁就考驗你識唔識將研究內容不斷推陳出新,應對訊息時代嘅挑戰。)

Level 7:通常講歪理最強係識得「揼波鐘」,消耗哂民間極寶貴嘅 air time 就代表佢贏。
(難度分析:要適當時候敢於中止對手自說自話,打出自己嘅節奏,攞返個 beat 出嚟。)

Level 8:明明毫無根據,但因為佢拎著專家學者嘅名銜,啲人就信佢講嘅嘢。
(難度分析:咁就已經唔只係即日一句 KO 佢嘅問題,而係要年年出版最認真嘅民間研究,累積我哋嘅公信力同本錢。)

Level 9:當歪理講唔贏你,佢就會話「你嘅意見只係社會一小撮人嘅意見」,搵好多分身上嚟扯貓尾,將你講嘅嘢邊緣化。
(難度分析:好難㗎,因為已經唔係事實同理據嘅比拼,而係資源同工具嘅較量,要靠「以小勝多」同「刀仔鋸大樹」嘅方法。)

Level 10:對著雷 X 鳴之流,啲歪理嘅無知程度同嘴臉十級難頂,點可能平心靜氣用理據回應……
(難度分析:研究員心裡知,但研究員不說 — 怒變笑)

所以講到底,大家平時睇人 KO 最開心,其實要 KO 歪理唔單只係事實同理據嘅比拼,而係資源同工具嘅較量呀!重要嘢就重覆多一次啦 — 要堅持事實與真相,我哋嘅眾籌仲爭少少,每人月捐 $300 大召集,請與我們一起抗擊時代歪理!

 

本土研究社 Facebook

發表意見