立場新聞 Stand News

拾回專業與尊嚴

2019/1/10 — 14:38

圖片來源:拾平台 Facebook

圖片來源:拾平台 Facebook

拾平台在葵涌嘅地區組織工作,由葵芳智芳街嘅社區資源回收中心嘅社區實驗,再轉戰返葵涌同石蔭區。我哋見番上次嗰位鄧生,佢俾我哋印象最深刻嘅,就係佢執嘅紙皮係整理得齊齊整整,永冇濕水,絕對可以話係乾淨回收嘅優質示範。鄧生認得我哋之餘,仲話我哋上次所派嘅宣傳單張仲保存好,有乜事需要幫忙時會搵我哋!我哋最記得就係鄧生曾經講過拾荒都應該要有自身工作嘅操守同職業道德,因為始終都關乎社區同市民嘅環境同衛生,好堅持自己係做緊環保工作。講真,點解鄧生咁肯定自己做嘅嘢係實踐環保,而且本身嘅環保回收意識十分之強,紙皮絕不淋水呢?

原來鄧生之前係喺製紙同紙盒廠做咗成二十幾年,所以佢好清楚整個紙品生產業嘅流程及工序,仲同我哋拆解埋回收紙廢料中紙盒嘅構造,由表面嘅牛皮紙、中間嘅紙芯,以至有膠質腹膜表面處理嘅紙,邊種同邊類型嘅紙質好難再循環再造咁,都一五一十咁同我哋分享佢嘅經驗,深知道堅持唔破壞廢紙循環再用質素嘅重要性。鄧生強調:「啲紙皮浸咗水,裡面嘅纖維其實已經破壞哂,上到大陸紙廠,根本連紙槳都做唔到!如果再溝埋不同雜質,更加唔使講,所謂再循環再造,根本同垃圾冇分別……」

但係我哋好多時見外面浸哂水嘅紙仲有舖頭肯收喎?「冇㗎!正所謂樹大有枯枝,係業界自己唔爭氣,政府又唔理,再咁落去,回收業真係收得皮……所以收濕水紙嘅舖頭我唔會去,反正附近幾間回收舖都爭住要我啲紙,質素好又企理呀嘛!

廣告

做乜嘢都好,先做好自己本份,守住自己嘅原則,尊重番自己嘅工作同要求,人哋點我理唔到,但至少要過得人、過得自己囉!」鄧生好認真咁話俾我哋知。所以,邊個話拾荒者唔係一份工作?佢哋唔單止係工作緊,而且仲係好專業同尊重自己所做嘅事。

紙皮叔鄧生同我哋拆解製紙嘅工序,同埋乾淨回收嘅重要性,真係同上咗堂真人圖書館冇分別,之後,佢再同我哋講區內回收舖嘅運作。原來單單係一條大馬路相隔嘅距離,就已經有三間回收舖並存,兩間係香港人開嘅地舖,另一間係由巴基斯坦籍人士經營嘅回收車。佢話大家係香港人都咁話,一間細舖就專收高質紙,但佢個秤(磅)就好犀利(意指呃秤),另一間所收纸嘅質量就好冇標準,而南亞朋友對乾淨回收就好有要求,濕咗水同混咗雜料嘅紙一律唔收,鄧生所處理嘅廢紙就係交俾佢哋。同鄧生傾完廢紙嘅學問後,打蛇隨棍上我哋去咗頭先講嗰幾間回收舖考察吓,細舖內籠果然真係好細,喺門口位置就已經認識到一位婆婆,佢話過往都遇到成車紙皮俾人偷走嘅經歷。跟住去到南亞回收車嘅位置,見到去嘅街坊所拎嘅紙的確同鄧生嗰啲一樣好乾淨企理,街坊話如果老闆見到你嘅紙浸過水,佢係會唔收嘅。最後去到斜路後巷嗰間,見到真係好多街坊排哂隊,短短十分鐘唔夠,就已經有五六位老友記拉住或推住紙過嚟。不過,我哋留意到呢間舖所處理嘅紙,裡面都夾雜住不少嘅塑膠同雜質,而且濕水嘅程度都好明顯……但無可否認,呢一區原來係有咁多拾荒街坊,所以我哋下次會喺街口搞個街站,同佢哋企定定,分享吓社區資訊,認識佢哋更多。

廣告

以現時內地回收廢紙嘅規格嚟講,收集番嚟嘅廢棄紙皮係一定唔可以濕水㗎啦,如果濕水嘅情況唔改善,最終只係摧毀咗整個廢紙業嘅出路,而收集嘅前線拾荒者連基本嘅操守都做唔到,其實對自生工作同回收舖嘅經營都冇好處,只會兩敗俱傷,除了在社區向市民進行教育,讓他們明白拾荒者的處境外,同時也需要透過教育去影響拾荒者嘅工作習慣,讓佢哋明白到提升廢紙出口質素的重要性,他們也是回收業的一分子,而且是前線重要的一員,不能忽略嘅係,其實可以由拾荒者先去帶領行業回收水準嘅提升與發展。讓他們能夠藉住帶動優化行業,「拾回」其工作嘅專業操守同被社會認同身份應有嘅尊嚴。

 

拾平台 Facebook

發表意見