立場新聞 Stand News

【揚威國際】靠香港地產商起可負擔房屋?留名睇走數~

2018/10/5 — 18:51

本土研究社製圖

本土研究社製圖

除咗華仔「真情」力推嘅填海之外,政府另外在 10 月最新施政報告極力想推嘅項目,就係地產商都虎視眈眈嘅「公私合營」開發新界囤積的農地:「公私合營」即是由政府出基建,再由地產商起屋,過程中會起返少少「公營」房屋出嚟,皆大歡喜咁話。

咪住先,查翻呢幾年嘅全球物業發展,可以發現香港地產商已經一早越洋英國同當地政府攪公私合營㗎啦。例如香港公司 Knight Dragon,喺倫敦泰晤士河套一塊市區靚地起樓,可以興建成 15,000 個住宅單位。呢個名為 Greenwich Peninsula 嘅樓盤,係當今倫敦東最大型嘅綜合商住發展計劃。

根據當地政府對新住宅項目嘅規定,呢類私樓發展必須將 35-50% 單位撥作可負擔房屋(affordable housing),包括市值一半租金嘅廉租單位同折扣價出售單位,先會獲得發展許可。所以呢個咁大型嘅發展項目,就規訂最少要有約 5,970 個可負擔房屋單位提供。

廣告

但係玩慣咗地產霸權鑽空子嘅香港地產商,又會唔會真係咁乖乖起平價屋俾普通市民呢?根據最新資料,原先規定要呢間地產商要起 38% 嘅單位做可負擔房屋,但係 Knight Dragon 利用咗一個黑技術 — 可行性測試(viability test)。透過可行性測試,原來係可以容許發展商一旦證明項目「賺唔到錢」,就可以起少啲可負擔房屋單位。出錢搵個顧問做個研究報告,就咁由原本 5,970 個(38%),大減至 3,930 個(25%),就咁就呃走咗約 2,000 個一早承諾嘅可負擔房屋單位。呢個香港地產商走數嘅行為形同「港蝗」,炒貴人地啲樓又唔跟政策要求,諗著賺到盡犧牲公眾利益,引起咗英國社會對公私合營嘅公憤。

最可恥嘅係,項目喺今年中開售,一房同三房分別最低價都高達 601 萬同 2,240 萬港幣,呎價高達 13,000 港元,貼近香港樓市嘅癲價。其實倫敦樓價過去幾年英國樓價都無大調整過,好明顯就係地產商聯同顧問公司玩弄緊規劃制度,做到盤數賺唔到錢,架空地方政府訂立嘅「可負擔房屋」供應策略,同喺香港玩規劃制度既方式同出一轍,事頭婆嘅後花園都冇面俾。

廣告

追溯返嗰個走數發展商嘅背景,原來 Knight Dragon 嘅主席就係四大地產商之一、新世界集團嘅鄭家純。而佢亦擔任緊啱啱請咗華仔賣廣告嘅團結香港基金副主席,睇嚟華仔都唔知佢啲金主走數有幾醒喎。同時,新世界亦係新界大地主之一,最新數字係囤積近 1,700 萬呎農地儲備,依家林鄭、地產商同土地供應小組夾計攪緊個新「公私合營」模式,保障佢哋唔被收回土地幫埋佢哋起路發展規劃,相信又會俾呢啲慣犯繼續破壞公眾利益。

大家諗下,規劃制度相對透明嘅英國,都畀香港地產商搵笨。香港政府近日仲放風話,「公私合營」當中,公營房屋單位數目將會「由政府與發展商溝通」、「視乎情況而訂」、有「獨立機制」,龍門隨時搬都得,搵鬼信呀?香港地產商充滿國際走數經驗,連事頭婆腳下都夠膽呃,你估對住林鄭呢個話唔到事嘅妹仔,仲唔玩到佢盡?

地產商喺外地公私合營走數已經明目張膽,依家政府仲要摏個頭埋去攪公私合營,同無時無刻都諗著賺到盡嘅地產商「與虎謀皮」,你話呢個同鄭家純同姓三分親嘅妹仔係咪真係好有可疑?

 

#一起走數的日子
#事頭婆都管我唔住_就憑一個妹仔就管得我住? 
#公私合營

延伸閱讀:
楊夏至、陳劍青:香港公私合營的歷史真相
林芷筠﹕公私合營的天真想像
黃肇鴻、陳劍青:改土歸流:下落不明的《收回土地條例》

💰打小人講真話 月捐撐起土地研究

本土研究社 Facebook

發表意見