Pazu 薯伯伯

Pazu 薯伯伯

旅遊寫作人,為最早一批在網上連載遊記的香港人,多年來足迹遍佈歐、亞多國,在喜馬拉雅山麓、東南亞、南亞等地區生活。著有《風轉西藏》、《北韓迷宮》、《西藏西人西事》及《不正常旅行研究所》,分別在香港,北京及首爾出版。作者 Facebook:https://www.fb.com/pazukong;風轉咖啡館:https://www.fb.com/spinncafe;作者博客:http://pazu.com/blog;Pazu 兒歌網:http://www.pazu.com;相集:https://www.instagram.com/pazu

2019/11/6 - 19:11

放棄?不了。

荃新天地美心外的圍板,佔用公家行人路。呢個集團,公地私用,早變常態。照片來自連登,2019 年 11 月 3 日。

荃新天地美心外的圍板,佔用公家行人路。呢個集團,公地私用,早變常態。照片來自連登,2019 年 11 月 3 日。

唔好意思,我真係放棄唔到美心。

先講美心特許經營嘅 Starbucks,我其實無飲好耐,因為覺得咖啡唔好飲。而 Starbucks 喺美國強調「第三空間」,嚟到香港開啲位置騎騎呢呢,例如喺德福商場嗰間,座位喺扶手電梯下咁陰濕,仲成日將啲公眾空間公器私用,當做營運場所,逼人點嘢飲。唔幫襯佢,無關政治,純粹品味考慮。

至於美心快餐嘛,以前學校飯堂由美心經營,大概因為螢光豬扒飯、螢光咖喱飯嘅頹飯陰影揮之不去,畢業後多年以嚟,幾乎無去過美心快餐廳。

廣告

至於同一集團嘅其他食肆,我承認係有幫襯過,尤其日本菜嗰啲,幫襯時都唔知同美心有關,但次數少到可以忽略。而家即使唔再去美心集團旗下嘅餐廳,但都好難用上「放棄」二字。

因為「放棄」二字,本身要有曾經留戀嘅條件,要你曾經擁戴過,擁有過,珍而重之過,先至有資格去放棄。英皇愛德華八世可以放棄皇位,係因為佢真係擁有過皇位。一個人可以放棄治療,係因為以前曾經去過治療。但係,如果從來都唔是呢個集團嘅擁躉,唔幫襯都無任何眷戀,係談唔上放棄佢。正如你沖張紙巾入馬桶,係唔會將「放棄」當做動詞。

至於美心嗰個坐享高息收入嘅太子女,聲稱要「放棄」年輕人,大家最關心嘅,唔係佢「放棄」之後,年輕人會有乜損失。而係,到底佢喺「放棄」年輕人之前,為年輕人做過啲乜?究竟係乜嘢原因,令佢咁有信心,覺得自己有資格去「放棄」年輕人?

太子女話,「香港失去整整兩代年輕人,而她會放棄這些年輕人,不會再浪費時間去跟他們講甚麼。」

其實到咗今時今日,佢已經完全無必要決定放棄定係挽留。

因為,年輕人早就捨你而去。

而捨你而去嘅人,又何止年輕人?

 

作者 Facebook