立場新聞 Stand News

【政府掃蕩 HA】繼續附和咁樣嘅法律,都係間接嘅加害者

2017/5/8 — 15:47

Hidden Agenda 入口

Hidden Agenda 入口

一起身果然見到好多人 — 好多係對件事有心,但係受律法主義嘅教條部分薰陶得太犀利嘅人,參與「評論」 HA(Hidden Agenda)事件。多人談論,係好事,證明 HA 再次不幸引起關注,但係,如果每一次講到 HA 比人搞,就搬出 HA 有責任跟足法律規程,唔跟足咪抵死,我覺得,係無全面去理解件事,亦都係將一個普通公民嘅要求定得太高。

當然,在此,我唔係話搞音樂,Rock n Roll 就奉旨公民抗命,就大撚哂,唔洗跟法律規程。不過,若果一群無權無勢嘅公民履行左佢嘅義務,盡左能力,試過哂跟從正常途徑做事,結果都係達成唔到自己想嚮社會所作、合理嘅自我實現嘅時候(我諗無人會覺得聽音樂、請 band 嚟香港係唔合理嘅事掛?),去到呢個位,已經唔可以再苛責公民做唔夠乜乜乜,個責任承擔應該係要轉移到有權有勢政法機關身上。再繼續苛責無權勢嘅公民,話「犯法就要拉啦」,即係 Blame the victim,而呢個 victim 係不合時宜制度所害嘅。

廣告

與公民相反,政法機關有權有勢,可以改變現狀。若果公民盡哂義務,都在社會上無法自我實現,政府同法律機關亦要因應公民嘅需求而作出轉變,或係推行政策,或係修改現行法律。

套返落依家香港個情況就係,無權者做哂可做嘅事,而政府各部門就群出封殺,唔去改變問題、唔去滿足社會嘅合理需求,反而係用諸多手段去搞掂「有問題嘅人」。

廣告

至於一啲事實上嘅嘢,其實好多,你如果有心評論、理解件事,只要搵多少少資料就可以搵到:唔去申請牌照?點會無,各部門踢足球。工廈消防做唔到?新 HA 做過哂消防所有嘢,check 過哂。working visa 問題?HA 搞左咁多年,點解到呢刻先做唔到?

講到尾,依家政府做法就係唔比你地用咁嘅形式玩音樂,一定要符合佢地官方主旋律;得罪講句,繼續附和咁樣嘅法律,都係間接嘅加害者。守法係好精神,但法律系統本身有無滿足公民嘅合理期望,有無壓抑個人嘅自由權利,都係思考守法守得有無價值時要諗嘅問題。

 

(原刊於作者facebook;標題為編所擬)

發表意見