立場新聞 Stand News

到避寒中心探無家者 分享物資 職員竟報警 荒謬之外是更荒謬

2016/1/27 — 10:44

資料圖片

資料圖片

昨晚去深水埗避寒中心探望無家朋友,民政事務署連一個話得事嘅職員都無,只係有一個看似MK的年青人「睇場」,佢同我講上頭比咗指示今晚唔俾派野同探訪,叫我打電話去民政事務署申請,我同佢講,避寒中心是開放畀市民,我帶埋啲嘢入去瞓,你俾唔俾我入去!

我冇理佢上咗去,最後十分鐘內將兩箱幾十隊鞋分享晒畀無家朋友,大家十分開心。到第二次入去,最後佢竟然「激動」到報警。

我同警察講,天寒地凍夜麻麻,山長水遠,有屋企暖笠笠唔返咁走嚟避寒中心有得分咩,大家心知肚明嚟得都係有心人,竟然要報警叫你們來?

廣告

期間,有兩位無家朋友因小事爭執,最後由我上前幫手調停平息,而警察同職員根本無意識處理,只係在傍邊「食花生」,畫面真係十分吊詭。

在這個富裕城市,竟然有咁多人流離失所,他們各自有自己的故事,我們的到來,除了分享物資,其實最重要就係令他們知道人間還有愛,社會很多人沒有忘記他們,令他們好好支撐落去,有個別的無家朋友因為看見我們的到來而流下男兒淚。

廣告

政府沒有做好自己的本份,有咁多人活在困苦之中,卻要攔阻關心處於弱勢社群的人,荒謬之外就是更荒謬,坦白講,昨晚見到警察那一刻我已有被捕返差館打算,不過我會同阿sir講叫佢諗清諗楚!因為我上得警車入得差館,就一定唔會保釋。

荒謬的事情,就用更荒謬的方法處理好了。

(標題為編輯所擬)

發表意見