立場新聞 Stand News

星光大道終於見到星光

2019/2/8 — 19:04

麥兜與麥太年三十晚現身星光大道。

麥兜與麥太年三十晚現身星光大道。

今個豬年,林鄭與其去上環兼落維園探訪和賀年,為何不趁今期最紅,到剛剛重開的星光大道,與麥兜和麥太在麥兜銅像前合照留念與港人及遊客打個招呼?要怪,就怪特首身邊的團隊,反應唔夠快,唔夠 marketing sense。

星光大道環抱無敵維港景色,已經無得輸,只不過以前日久失修、無設計、無心思、無管理,所以無人講亦無人去。今次政府夥拍新世界重塑的星光大道,從建築設計、用料、品味、交通設施配套以至商店營運,的確把這個原本面如死灰的旅遊景點,注入生機,立時變回香港之光。

不得不承認由商界管理,比起政府明顯係有 marketing sense,識玩本土意識,店舖的選擇已經夠棒,如美樂士多,飲懷舊綠寶、用紙製公雞碗賣港式魚蛋燒賣,顧客自然大排長龍。聽講第一日的生意額已經夠一個月租金,真係發過豬頭,唔似政府搞美食車,搞來搞去搞到一頭煙。

廣告

科技元素 AR 又 QR,唔係最新,但唔少得。互動睇資訊,又可以跟明星合照,的確好玩又窩心。

仲加入了不少新銅像及手印,但重點唔係 Do 姐和君如,而係麥兜。無論對於港人定遊客,都咁受歡迎,仲要撞正今年豬年,自然爆紅。才開了幾日,已經話麥兜銅像被一眾愛豬之人,摸到出現甩色疑雲。隨即來一招乘勝追擊,就在年三十晚,請來麥兜及麥太親自到場探望銅像,與市民拍照留念,有噱頭又有咁大個可愛豬頭,?到大人細路都開心。

廣告

把今次星光大道與政府自己搞的 project 及香港其他海濱比較,好明顯康文署搞的全部又齋又 dry。睇嚟今次政府,真係要向商界鄭公子學習,加些生意及 marketing 頭腦,把星光大道,重新加入更多星光。

 

原刊於《蘋果日報》

發表意見