立場新聞 Stand News

是其是,非其非

2018/7/21 — 15:01

深圳科技園(資料圖片,來源:維基百科)

深圳科技園(資料圖片,來源:維基百科)

呢幾年同時生活在三個平行空間,本地社運圈、本地商業圈、外國商業圈,我想同大家釐清幾點。

(1) 冇需要逢係大陸嘅嘢就先入為主,一個國際資源匯聚嘅地方,十幾億人,當中真係沒有值得你去學習嘅地方?由習近平領導的中共,政制越走越專制,社會問題十分嚴重,對基層和異見者的打壓係愈來愈過分更無恥。這是中共和國家管理層面的問題。十三億人嘅管理,邊有 perfect 㗎,你打壓我都要講出真相,只有正視問題我們才能作出改變,一個社會先會不停改進!

話雖如此,我敢話我係大陸住過工作過 7 年,呢段時間絕對幫助到我建立我的人生觀及辦事能力。我今日先見完一個廿七歲嘅香港人 CEO 喺廣州搞區塊鏈科技,靠食腦都搵到幾百萬純利一年,亦唔需要特別依靠政府。聽完後,我嘢都費事講就同佢簽合作協議啦。

廣告

689 叫年輕人多上大陸發展有咩問題先?深圳、廣州等地在進行的創新工作,係面向世界,會經歷市場考驗㗎。唔好真係以為大陸樣樣嘢都好雞先得㗎,未了解已經睇唔起,呢種係冇撚出色嘅表現。

馬雲係 YouTube 嘅 motivational clip 有邊個鬼仔未睇過?順豐嘅王衛又難道唔係企業管理奇才?你以為人哋跪低曬?明爭暗鬥你自己無去了解啫。好似四眼哥哥當初受電視訪問時,on 99 咁話「我唔需要知道一帶一路做乜嘢因為呢啲嘢唔關我哋香港人事」。你條懵炳,呢度先有我哋借力打力反擊嘅機會呀。

廣告

(2) 我哋嘅責任係保護香港。惡法固然要擋,民主固然要爭取,爭取最大嘅自主權,重奪邊境話語權和單程證審批權,用行動要求政府對港人問責。這些是一個基本公民應該做的,自己嘅地盤比人踩,如果我鳩縮怕事唔做嘢,咁即係任人魚肉啦。咁窩囊廢冇骨氣嘅嘢,我就做唔出啦。抗爭有道理但你唔可以唔講道理,乜 Q 都反,有些少知識嘅人都當你班黃屍獨撚上曬腦啦。

(3) 粵語係我哋文化核心,呢個戰場一定要打,呢條線一定要守住。咁但係學普通話又有咩問題先?你以為得大陸用呀?台灣、新加坡、馬拉,N 個海外華僑多嘅地方都會用上普通話。點解要維護廣東話就要用盡一切辦法不學普通話呢?兩者有直接關係嗎?係亞洲搵食,兩言三語基本功來的,政治上腦到一個點,handicap 自己係乜嘢道理呢?

我相信本土主義,有時當政府太過分嘅時候,只有用行動非暴力甚至暴力行動來告訴政府,我地人民先係莊家。This is my home and I’ll defend it with every drop of blood flowing through my veins. 點解?因為香港係中西文化匯聚嘅地方,而我就係呢種互動製造出來嘅產品。但唔該記撚住,「本土」唔係要你做鄉下佬,唔係要你做井底之蛙,唔係要你圍爐取暖。「本土」係要你把呢個地方嘅優勝之處宣揚出去,把握自己命運做一個有用有貢獻願意犧牲嘅社會公民!

 

原刊於作者 Facebook

發表意見