立場新聞 Stand News

智障漢錄口供 詳細真實對答

2015/5/13 — 16:00

遛狗翁被殺案,警方拉錯智障男子,儘管警方昨晚表示歉意,但未回應被指筆錄口供做假等質疑。事主家屬今日在記者會上,披露警方在拘捕事主時,未有家屬在場錄取的筆錄口供,以及家屬在場時的視像錄影詳細對答,顯示兩者有明顯出入。

警方於5月2日(周六)拘捕事主,並即場錄取口供,其後帶署拘留,當時未有家屬在場,根據警方向家屬提供的筆錄口供,事主被捕時對答流暢,明確表示自己由「屋企去美林邨」,並承認因不滿伯伯放狗,將其推倒在地,又清晰表示「睇新聞知道伯伯死咗」。

廣告

不過,根據家屬在場時的視像錄影,事主明顯未能清楚明白警員的問題,回答時經常重覆警員的提問用詞,例如警問「有無推伯伯」;事主回答「推伯伯」。另外,事主從未能表達出警方筆錄口供中提到「屋企去美林邨」、「睇新聞知道伯伯死咗」等的完整意思。警員在錄口供時多次詳述案情,直接問事主「係咪?」事主似不明所以地回答。

【家屬提供的警察筆錄口供,以及詳細錄影口供文字紀錄】

廣告

筆錄口供(沒有家人在場,警方向家屬提供):

警:你叫乜野名
答:XXX(中文全名)
警:幾多歲呀
答:30歲
警:你屋企係邊
答:XXX(地址)
警:今年4月13日夜晚七點你係邊
答:係屋企去美林邨
警:去美林邨做乜
答:推左伯伯落地
警:我有理由相信你2015年4月13日係邊度犯了謀殺,唔係事必要你講,除非你想講,所講有可能用筆記低及用來做證供,你點解推伯伯落地
答:因為佢放狗
警:推完伯伯跟住點
答:睇新聞知道伯伯死左
警:唔係事必要你講,除非你想講,所講有可能用筆記低及用來做證供,你明唔明白
答:對唔住呀

錄影口供(家人在場,根據錄像的文字紀錄):

02:32
警:你面前有一張羈留人士通知書,解釋了給你聽,你可以看這張通知書,你需唔需要使用任一個權利?
答:......(好細聲,唔知講緊咩)
警:你需唔需要使用任何一個權利?
答:......(好細聲,唔知講緊咩)
警:你可唔可以講下你需唔需要使用權利?
答:可以
警:需唔需要使用?
答:需要使用
警:你想使用邊一條?指出來?
答:(無意識地指出)
警:即是要通知家人,我已經做了,你同意嗎?
答:同意
---
警:你同唔同意接受錄影會面?

答:......(好細聲,唔知講緊咩)
警:可唔可以大聲講一次?
答:大聲講一次
警:你同唔同意接受錄影會面?
答:你同唔同意接受錄影會面
警:你同唔同意將我地嘅會面過程錄影低呢?
答:錄影低呢
警:我繼續問你問題好唔好?
答:好
警:你而家精神狀況點樣?
答:......(好細聲,唔知講緊咩)
警:精唔精神?
答:精神
警:使唔使休息?
答:使唔使休息
警:需唔需要搵律師在場陪住你呀?
答:......律師陪住你呀......
警:使唔使搵律師?
答:使唔使搵律師
警:你答我,使唔使搵律師?
答:使唔使搵律師
警:大聲D,使唔使搵律師?
警:問哥哥,可否做個見證,做錄影會面同需唔需要律師在場?
哥:唔需要。

07:05 介紹錄影會面室
10:25 
警:現在調查謀殺案,警誡詞,明唔明白?
答:明白
--------
警:陳述案情,下午你講對唔住係咩意思?
答:......(好細聲,唔知講緊咩)
警:點解你講對唔住?
答:......(好細聲,唔知講緊咩)


12:45
警:係2015年4月13日晚上7:30,你係邊度?
答:係邊度......(好細聲,唔知講緊咩)......XXX室
警:你係邊度?
答:......(好細聲,唔知講緊咩)
警:慢慢講,你果時係邊?

答:......(好細聲,唔知講緊咩)
警:慢慢講
答:XXX室
哥:XXX室係咪屋企
答:係


13:50
警:你係2015年4月13日下午7時30分係美林邨?
答:係
警:美林邨係邊度?
答:美田邨
警:美田邨?
答:美林邨
警:美林邨係邊度?
答:......(好細聲,唔知講緊咩)


14:54
(轉警察)
警:你記唔記得落小巴果時,你同我講,係2015年4月13日,你係美林邨推跌個伯伯?
答:係
警:你話個伯伯放狗,你唔鍾意佢,係咪?
答:係
警:點解你唔鍾意佢放狗?
答:佢放狗
警:點解星期一係美林邨出現?
答:......美林邨
警:記得?
答:記得
警:伯伯係邊度放狗
答:伯伯
警:係咪係球場果度?
答:係
-----------
警:你點推佢呀?
答:咁推
警:兩隻手一隻手?
答:兩隻手一隻手
警:邊隻手
答:兩隻手
警:幾大力推佢?

答:......(好細聲,唔知講緊咩)

示範
-----
警:伯伯有無跌低?
答:無跌低
警:有無?
答:無
------
警:跟住去左邊
答:......返屋企
------
警:仲有咩人係籃球場?有伯伯有隻狗?
答:係
警:仲有咩人係籃球場
答:籃球場
------
警:你返左美田邨,有咩人,記唔記得?
答:記得
警:屋企仲有咩人?
答:記得
警:XX,你望住我,你係屯門一個地方,你係果度做咩,叫做聖公會福利協會康恩園?
答:......(好細聲,唔知講緊咩)
警:你係果度做嘢定瞓覺?
答:做嘢瞓覺
警:附星期幾(編按:意思應為逢星期幾)返屋企?
答:星期六
警:星期日?
答:返來
------
警:星期一點解你係美林邨?
答:......(好細聲,唔知講緊咩)
警:記唔記得?
答:記得
警:點解你係美林邨?
答:......(好細聲,唔知講緊咩)
警:即係你自己走左
答:係
警:偷走?有無話比姑娘聽?
答:無講
------
警:搭咩車去美林邨?
答:......(好細聲,唔知講緊咩)
警:搭咩車去美林邨?
答:美林邨
警:搭咩車
答:80號

-----
20:45
警:係屯門點搭車出來?
答:XXX室
警:唔係XXX室,係問你屯門點出來?搭咩車去美林邨,記唔記得?
答:記得
警:用散紙定八達通
答:八達通
警:用八達通定現金
答:現金
--------
警:頭先你話見到伯伯放狗,你推佢,你走嘅時候有無見到伯伯跌低?
答:無
警:你見唔到?你有無見到?
答:有見到
警:佢有無跌低?
答:無跌低
警:佢無罵你?
答:無
警:你有冇罵佢?
答:無
警:你有無同伯伯講嘢?
答:無
警:你記唔記得?
答:記得
警:有無講過嘢?
答:唔記得
-----
23:45
警:XX,你望住我,你果日係屯門,搭唔記得咩車,去到美林,見到伯伯放狗,就兩隻手推佢,伯伯有無跌低,你就唔清楚了,係咪?跟住返美田村定返屯門?
答:返屯門
警:有無返XXX,返屋企?
答:有
警:有無去美誠苑?
答:無
警:美松苑
答:無
警:其他地方?
答:無
-----
24:50
警:你係咪自己一個?
答:係
警:你去咗籃球場?
答:係
警:去籃球場做咩?
答:係
警:去咗籃球場做咩?
答:係
警:XX,你望住我,你去籃球場做咩?
答:去打波
警:你點解要推伯伯?
答:推伯伯
警:有無推伯伯?
答:無…有…
警:XX,你望住我,有無推伯伯落地,有無推伯伯
答:推伯伯
警:點解會做果個動作
答:......(好細聲,唔知講緊咩)
-----
警:我再問你,你有無去過美林邨籃球場?
答:無
警:你又話比我聽著住件衫嘅?
答:有
警:你記清楚
答:有
警:即係而家記得返?
答:係
-----
警:你點樣推伯伯?
答:無推伯伯
警:頭先示範又話有推?
答:無推伯伯
警:我再幫你回憶吓,好唔好?
答:好

----
示範
----
警:你望住我,你話比我聽,你有咩病?
答:......(好細聲,唔知講緊咩)
警:即是自閉症?
答:係
警:幾時開始有?10歲、20歲,一出世有?記唔記得?
答:記得
警:一出世有?
答:係
警:係院舍有無睇醫生?
答:睇醫生
警:有無睇醫生?
答:無
----
警:你明唔明白我用廣東話講嘢?
答:明
警:平時有無睇新聞?
答:有
警:伯伯死咗你係邊度知?睇電視定頭條日報?
答:睇電視
警:你有無同屋企人講你推跌伯伯?
答:無
警:你知唔知你可能做咗啲唔啱嘅嘢?
答:唔啱嘅嘢

發表意見