立場新聞 Stand News

暗渡陳倉

2018/8/21 — 19:06

資料圖片,來源: pixabay.com

資料圖片,來源: pixabay.com

現實中,真係有呢啲騎呢公司,咁低裝,咁白痴,咁野蠻,咁專制,咁 1984,𠵱家 21 世紀喎,人有人權,員工都有權自由評論,放工前,受人二分四,跪地餼豬乸,放工後,恢復自由身,使唔使對待奴隸咁,整番一個東廠,24 小時全天候監察?話唔埋已經「form突」咗。

呢啲無水準無胸襟無信心嘅公司,最鍾意對號入座,硬係覺得有人話緊佢,心有戚戚然囉囉攣,一個網上嘲笑,一個 emoji,杯弓蛇影,煞有介事,小事化大,小事化作無限大,哎吔吔,我戥佢可憐,太該煨,太窩囊囉。

一個正常嘅公司或主管,有兩件事可以日日做。第一,出盡九牛二虎之力,解決日常碰到嘅問題;第二,嘗試創作,等下屬同僚可以心無旁騖,埋頭苦幹,專心工作,日子有功,贏面一定高過隔離競爭對手。

廣告

相反,九流公司好做唔做,做埋呢啲無益無理性無建設性嘅低 B 白痴嘢,對建立互信,增加業績,提升效率,減少營運開支,營造創意環境,毫無幫助,仲攪到人心惶惶,太令正常人失望。

身在曹營心在漢,住人屋簷下,不得不低頭。一個人,工作時兩條心,唔算多,明嘅唯唯諾諾,你點話,我點做,暗嘅秘技自珍,有好嘢都收收埋埋,梗係唔益垃圾公司,兼且暗渡陳倉,早撇早著。

廣告

公司之將亡,必有妖孽,員工搵定後路較腳,流失率高處未算高,藏頭露尾,梗係唔敢公佈,頭頭碰著黑,愈窮愈見鬼,無講錯嘅,至於你會點做,或者享受畀人監察,you 諗 you。

 

作者 Facebook

發表意見