立場新聞 Stand News

最騎呢學校 Market Positioning

2016/10/4 — 12:57

四川師大喺微信 Post 咗一批「女神老師」相,呢批相分別係佢地美術專科、英語、表演系、設計專業等各專科嘅老師。圖片來源:網絡圖片

四川師大喺微信 Post 咗一批「女神老師」相,呢批相分別係佢地美術專科、英語、表演系、設計專業等各專科嘅老師。圖片來源:網絡圖片

當年讀男校,邊科 Miss 靚女,我嗰科成績就特別好。究竟靚 Miss 係令學生更專注,定係更唔專注呢?

以我親身經驗,答案係前者。

七月份讀到《The Journal of General Psychology》一篇文章,美國 University of Nevada 做咗個有關老師美貌度對學習成效影響嘅研究,當中找嚟 131 名大學生分成兩組做實驗,安排佢地聽同一段「物理學入門」嘅上堂聲帶,但一組播放時學生望住張靚女相,另一組則望住豬扒肉照,話俾學生聽照片跟聲帶係同一個人,播完後再安排全部人就課堂內容做一個 25 題嘅小測驗。

廣告

結果我諗你應該估到:靚女 Miss 組嘅成績更佳,而學生也對課堂給予較高評分。

但有樣嘢你未必估到:131 名受訪學生當中,66% 係女性。

廣告

索 Miss 有助學習,原來唔係青春鹹濕仔獨有現象。

負責嘅三位心理學研究員 Richard Westfall、Murray Millar 同 Mandy Walsh,對靚女助學呢個現象提供兩個解釋:

一、心理學有唔少研究指出,靚人能更引人注意,亦令人覺得更有說服力,而對靚 Miss 的專注對學習有幫助。
二、同自我應驗預言效應 (Self-fulfilling prophecy effect) 有關。學生對靚 Miss 更專注、更正面、更有好感,會令老師想保持自己嘅美好形象,從而投放更多心機同時間準備教學,形成良性循環。

唔知係咪受呢個研究啟發,最近四川師範大學竟然公開以靚女 Miss 作招徠。

四川師大喺微信 Post 咗一批「女神老師」相,呢批相分別係佢地美術專科、英語、表演系、設計專業等各專科嘅老師,P 得有幾勁冇人知,但牌面睇算有睇頭,引發網絡爆紅,一眾慾海網民爭相點評吹水。四川師大有靚 Miss 呢單嘢早有前科,2014 年校內一位新嚟嘅英語老師-肖珠老師,被同學偷拍放上網絡後一夜爆紅,唔單止令到班學生唔走堂,連隔離系嘅學生都狗衝晒黎聽課,個課室坐滿人之餘仲逼到要企哂響走廊同門口,最後誇張到要大學出動保安維持秩序先上到課。今次師大玩到 AKB48 咁樣,唔知最後要唔要出動軍隊。

今年年初喺國內網絡上,曾經流傳一份關於中國著名大學老師顏值排行榜嘅非正式統計,北京大學排第一,上海同濟大學第二,而四川師大只得第三。推出呢批相,似乎四川師大有意爭奪「人間教學兵器譜」嘅第一名。

學校嘅市場定位,竟然有「靚女多」一環,騎呢到宣傳「女神 Miss 戰隊」,真係無奇不有。

下次聽到有學校宣傳自己「師資優良」,你記住問清楚:

「唔好意思,你剛才個「資」字,係「資質」個資,定「姿色」個姿呢?」

 

原刊於作者 facebook

發表意見