立場新聞 Stand News

有啲嘢,連 Package Lau 都做唔到

2018/8/31 — 14:12

劉鳴煒

劉鳴煒

香港老友 A 君與父母今早來澳,準備出席澳門親戚今晚的婚宴,趁中午的 lunch break,我倆相約在氹仔某餐廳午飯。到餐廳時,A 君已坐低,一個人玩緊手機…

「喂,咁早到呀?」我話。

「咁啱係附近嘛!啱啱去咗金光大道,冇嚟澳門幾年,又多咗幾間新酒店。」A 君把剛才跟父母的合照給我看,背景是今年年頭開張的 MGM Cotai。

廣告

「世伯身體幾好嘛?唔叫埋佢一齊嚟?」A 君爸爸幾年前做過大手術,身體一直麻麻。

「都可以啦,起碼仲出到門過到嚟澳門。有問過佢嚟唔嚟同我哋食 lunch 㗎,但佢都約咗啲澳門 friend。」

廣告

「咁咪好囉,幫我問候下佢老人家。係喎,上次你話睇緊樓,買咗未?」我問。

「未呀,儲鬼到首期咩。」

「聽 Package Lau 話,去少幾次日本咪儲到囉。」我講笑地說。

「屌,唔好講呢條離地仆街,今日又有新聞。」A 君把手機遞給我,螢幕顯示著《劉鳴煒:10 歲生日收 10 萬現金,一元也沒花,全部存入銀行》的大標題。

我懶得看內文,就回應話:「離地還離地,你又真係吹佢唔漲,人哋老豆係大劉,身高 1 米 8,個樣又唔差,名都有得你叫 Package Lau,成個 package 贏哂啦。」

「樣唔差?成個徐步高咁喎。」雖然真係似似地徐步高,但明顯 A 君這番話,只是無奈中的一點安慰。

「似徐步高又點,起碼好過你個鼻大到成個成龍咁。算吧啦,人地投胎投得好,你有邊樣嘢好過佢?」本來想藉此轉話題,因為真係無興趣繼續討論呢個二世祖。

兩秒後,「唔係喎,有樣嘢我今日已經做到,但佢有錢都一定做唔到。」A 君仍糾纏於呢個 topic,我唯有敷衍地問:「乜嘢咁巴閉呀?」

「同老豆過嚟澳門囉。」

呢句,真係駁唔到…

 

作者 Facebook

發表意見