立場新聞 Stand News

有朋友喺機場做,6pm會放催淚彈

2019/8/13 — 20:20

【文:Johnny Chung(「馬鞍山人社區團隊」社區主任)】

成晚見到有幾個唔同嘅討論點:

1. 假消息
2. 目標達成所以撤走咗都無所謂
3. 清場都驚點樣真係叫黑警還眼

廣告

首先要搞清楚每個點嘅先後次序。首先最初出現機場呢個諗法係因兩個原因,對外宣傳同埋警察唔敢喺機場有大動作。

「警察唔敢喺機場有大動作」係一個好重要嘅因素,因為最初就係因為呢一點講到入機場係和理非除咗三罷外另一個可以做得最有影響嘅嘢。就係D人諗曬所有唔同情景,只要唔衛禁區,警察都一定唔會武力清場,咁即係話入機場嘅人入面確實有一部份人係因為覺得抗爭成本低而入去,用「人太多機場唔夠大」嘅方法去癱瘓機場。咁所以呢班人入面有幾多係預咗面對清場甚至係流血嘅覺悟呢?老實說唔會多過一半。你見好多人連無用嘅N95都無就知。同埋要試吓理解和理非對於清場嘅恐懼。和理非平時遊行完就即時散水。唔好講話面對警察舉槍,其實可能連親眼望住噴胡椒噴霧都未試過。所以一傳話清場,仲要係機場另種無得守嘅場景之中,果種恐懼其實係好大。

廣告

然後就要講吓「目標達成所以走得」。目標?唔係五大訴求咩?唔係要持續癱瘓咩?最起碼都要黑警為隻眼道歉掛...原來唔係。原來「目標」只係指癱瘓機場運作。而且「目標達成所以走得」其實係喺假消息出現之後用嚟勸人走嘅原因。「6pm出清場,依家已經無飛機起飛,今日目標達成,走咗先啦」。咁即係話,「目標達成所以走得」其實係因為假消息嘅出現,令到D人擔心安全,而用嚟勸人/自己安心走。

咁如果調返轉呢?如果一開始無假消息嘅出現,仲會唔會有「目標達成所以走得」呢個點呢?起碼中午行動開始之前,未聽過任何為機場行動劃線嘅討論。所以「目標達成所以走得」都幾肯定係一個事後嘅安慰,多於係一個事前大家嘅共識。

而假消息呢?我會話尋日係比假消息搞散咗。有人或者話「唔係喎,係散水撚叫散水喎」。真正嘅散水撚係無事無幹風平浪靜就無啦啦叫人散水。正如我頭先所講,尋日叫散水叫目標達成其實係建基於接受咗錯誤嘅清場謠言而擔心其他人安全而叫散水。

坦白說,我唔係對散水失望,我係對亂傳謠言而覺得好失望。尋日好多人對於謠言嘅分析力倒退去到2014年928咁樣。呢兩三個月學到嘅嘢一下子無曬。即係好似比卡超每去到新一輯都好似Lv1咁樣。928傳過警隊內部錄音啦又有解防軍入城又話出動坦克,最後係乜都無發生過。大家仲記唔記我722?個個都話收到黑社會朋友消息,全港見人就打。最後係全港嘅街道鬼影都無隻。

唔該,拜託各位要做一個負責任嘅資訊傳遞者。無法核實嘅,就唔好share出去。否則亂傳假消息,只係同無腦藍絲一樣,覺得消息夠爆夠煽動就傳出去,無視真確性。

循例講少少點樣分辨資訊真偽

Whatsapp/WeChat/LINE etc. :
「我姐夫係警察,佢話呢...」- 呢類嘅whatsapp文字可信程度係0。如果有咁多姐夫做警察,我哋會比警察臥底陰到?太古站一出地面就係警察我地會唔知?
「我表弟個妹夫喺機場做,佢收到email...」- 呢類其實可信程度都係0。唔該叫佢直接影個email/通告出嚟。或者最低限度都影職員證再加張紙寫兩句嘢。
「(錄音)」- 可信程度一樣係0,我錄完把聲擺上網我話我係控制塔職員都得啦。

圖片/影片:
有圖唔一定有真相。依家最興就係喺幅圖上面加幾隻字,就當係fact check咗。呢D唔係叫fact check,呢D係小畫家都做到嘅嘢。又或者係張圖send出嚟再加文字caption,兩樣嘢要分開睇。

圖/片真係要用腦去睇多少少。首先要睇吓背景同件事嘅發生吻唔吻合。例如睇吓背景D車牌、道路設計等等係咪香港。

如果真係香港,就要再睇吓圖嘅內容同文字係咪一樣。例如兩個星期前就有幅水炮車嘅相,就話係出緊港島預備對付抗爭者。但仔細D望幅相,車頂兩枝炮仲包咗袋、車身掛住「路面測試」、更重要係附近完全無其他警車。咁就知道幅相可能係真,但文字係錯誤描述。又講吓尋日話機場熄燈幅相,大家可以即時上facebook是旦睇一個live已經知有無熜燈。用多少少常識,如真係熄燈,現場竟然會無人開電筒?

唔識分類嘅「臨場消息」:
斷網/上唔到網 - 人多就當然上唔到網啦打唔到電話啦。同埋斷網應該係會電話收唔到訊號,即係右上角會係一格都無。
無鐵路 - MTR app半個鐘內應該會update到消息,又或者D新聞app會彈通知
無巴士 - 可以開個google map睇吓路面情況先。究竟係巴士塞車入唔到嚟定係真係巴士停服務,兩個概念完全唔同。

P.S. 我唔希望兩個鐘後喺whatsapp group會見到幅相...

發表意見