立場新聞 Stand News

有膽識至好搵何韻詩啦!

2016/6/6 — 17:37

LANCÔME 聲明 (左),何韻詩 (右)

LANCÔME 聲明 (左),何韻詩 (右)

Lancôme的活動風波,一地花生,真係 C9 都忍唔住講句,乜攪到豬八戒照鏡,兩邊不是人啊?出左活動廣告,被大陸憤青留言就取消活動,真有需要咁大反應咩?你搵何韻詩做音樂會之前應該預到會有咁既效果,如果話無預計過就更傻豬豬、不知世情,提議同批個的尐人炒得。如果事前計過度過擔得起負評又點解要取消?只會比香港人話你向強國跪低,群起攻之,形象一跌好難救,前事不忘「負皮王」唯唯之師。

連出兩篇通告又係傻豬豬,第一篇聲明指何韻詩不是品牌代言人,聲明完全無頭無尾,對於不知事情始末的人,以為係何韻詩自己白撞冒認代言人,搵你著數,叫人情何以堪?第二篇聲明的「有可能出現之安全因素」, C9 真係中文差,都吾明你講乜?估計係由「For safety reason」(原文 possible safety reasons)夾硬譯,你係咪想講「或會出現危險情況」或「避免有意外發生」,真係要請教貴公司的公關大員。

兩篇聲明的英文都係差,第二篇只得幾句英文已經有咁多錯誤, 比網民恥笑同鬧都無辦法,點解咁大個品牌都吾比錢搵個專業英文編輯睇下至出?呢尐錢唔慳得架!好多網民用英文鬧,品牌即時全球響朵,好快上國際版,可惜會係個公關災難的教材。

廣告

在品牌的 FB 專頁,負評不斷被隱藏,每個post有幾千個評語,你隱藏得幾多?品牌同事一點都不明白 Social media 能載舟更能覆舟,開得專頁當然有機會比人鬧爆,與其隱藏負評,不如暫時停左專頁或不接受留言,但公關災難已成,暫時應該乜都唔好做,靜靜企係度比人鬧。如果有心要挽救品牌形象,應該即時向何韻詩道歉,捐一百幾十萬比何韻詩指定的慈善機構,買返少少人心。

廣告

發表意見