立場新聞 Stand News

有關投資和被投資

2017/7/31 — 17:03

當日投資者入股我公司,感覺已經係遠古年代嘅事情。投資者同我嘅關係,由入股一刻開始,一直抖纏不清至今。別人跟投資者的關係,也許未必如我這般混亂。到底這個investor是敵還是友,過了這麼多年,我還是說不準。朋友問我,有冇後悔當日草率將那部份的股權賣了給這邦人?我話,人生冇得後悔,俾我再揀多次,我還是會做同一樣的決定。飲水思源,唔係當日有人買起你啲本來就唔值錢嘅shares,你嘅生活,恐怕又唔係好似今日咁舒適了。

投資者普遍追逐利益。我嘅呢位投資者,利益故然要追逐,但慘在佢有夢。咁,佢有夢想時我又有夢想,而佢嘅夢想卻比我嘅「壯觀」無限倍。其實咁就大鑊了,我話我要sustainable,佢同我講要think big。think big?冇問題吖,如果你肯加碼投資,又或者引入更多資金的話。'I am actually very flexible." 我話。世界冇免費午餐,但口爽荷包立係商業常態。

世界唔同咗,資本市場入侵各行各業。追求sustainable變成了石器時代般嘅老舊思維。最近投資者又同我講話要think big了。我心裡暗叫了一聲x街,然後,一臉無奈地認同了他的「雄圖大略」。你想搞大佢,咁搞囉。但,你肯科幾多水先?吓?你想象徵式科些少然後用公司儲備?我心裡忍不住爆了句「x你吖…」,然後話:「你年尾嗰陣,你拍心口guarantee你個FC唔好走嚟入我low cash flow的話,唉,咪go ahead囉。」

廣告

拍心口呢樣嘢,幾錢斤吖。此時此刻,佢梗話好格。怕且年尾埋數,又要同你班擦鞋仔下屬開片了。

*****

廣告

做了「被投資」嘅角色咁多年,深知道人出錢你出力嘅壓力。一年前,我決定要改變吓,試吓做投資者嘅角色,平衡一吓心理。

我財力有限,投資都只係小額。我當然也希望think big,最好投資少少然後回報多多。但我清楚現實邊會咁理想?這些投資,我直覺好像買彩票一樣。買中,梗開心啦,但要明白,買唔中嘅機會其實蠻大的。

我跟那位「被投資」嘅朋友講:「嗱,我錢係得咁多,玩晒就冇架啦。你盡力啦。」朋友點了點頭,說會盡力做架啦。並且「盡可能」唔駛再集資,哈哈。

朋友跟我講咗好多打算如何營運,如何發展嘅計劃俾我聽,我都係循例聽吓就算。問心,對住一盤純粹出錢,而唔落手落腳管理嘅生意,我其實冇乜所謂。反正,我最清楚,你越多意見越多聲氣,只會對營運者構成壓力。營運者為咗應酬你,搞到檔嘢三不像咁,何苦?你嘅角色係個pure investor,就交返呢個角色要交嘅戲囉。我淨係對年尾收股息有興趣,其餘的,是但啦。

朋友,你這盤生意,對我嚟講係投資,但對你嚟講,係事業。
一切依你意思就可以了。

我嘅錢押在你嘅心血之上,如果真係要輸,就一齊認命吧。

 

作者 facebook

發表意見