立場新聞 Stand News

朱凱廸做咗議員樓價仲貴

2016/9/11 — 11:30

以8萬多票當選的新界西立法會當選人朱凱廸,到灣仔警察總部舉行記者會及報案,說明他人身及家人安全受威脅。(圖片來源:Joey Kwok Photography)

以8萬多票當選的新界西立法會當選人朱凱廸,到灣仔警察總部舉行記者會及報案,說明他人身及家人安全受威脅。(圖片來源:Joey Kwok Photography)

立法會選舉塵埃落定,朱凱廸做咗新界西票王,以佢對地產商咁仇視,怕且樓價都有啲壓力。

點知早幾天跟位發展商高層食飯,佢話朱凱廸呢類憤世嫉俗嘅人上場,好有可能拖慢地產商發展步伐,令到收入受到影響,但對解決樓價問題會適得其反,樓價隨時會更貴。

老友話呢類人骨子裡就敵視地產商,認為地產商之所以財雄勢大,係地產霸權嘅結果,點解有霸權?咪因為地產商壟斷土地市場,點解可以壟斷?背後唔使問梗係官商勾結,利益輸送喇!於是斷定地產商啲土地係不公義攞返嚟,特別喺新界,係掠奪弱勢社群居地以自肥,於是正義上身,乜都要反,乜都唔俾發展。

廣告

冇地發展樓價侷升

大家都知,香港土地就係咁多,市區除咗啟德舊機場塊地外,都冇乜發展空間,新界係唯一出路,但今日要喺新界發展,除咗要擺平啲環保人士外,呢班視地產商為死敵嘅人仲難應付。佢地幾乎逢發展都反,導致收地極度困難,即使你有地發展,佢哋又會諸多阻撓,發展進度被拖到好慢好慢。作為地產商,都係靠賣嘢維生,只不過啲貨係樓咁解,少咗樓賣,收入肯定減少。

廣告

不過,佢地收入減少唔代表樓價會跌,好簡單,樓價都係決定喺供求定律,如果經濟情況冇乜大改變,市場供應減少下,樓價肯定會上而唔係會落。朱凱廸做咗議員,佢視地產商為殺父仇人情況下,非理性反對發展,市場冇樓賣,價係咪上嘅機會大過跌囉。

鬥臭你班地產商

老友批評話好似朱凱廸呢類人,只係滿腔理想,一股蠻勁,永遠認為自己好啱而別人係錯嘅,社會上有錢人就係魔鬼,窮人就永遠是對的。就好似恒基地產收馬屎埔塊地,發展商依法清場,趕走租霸好合理,但反而有唔少人認為租霸係受害者,發展商係惡霸,真係以為香港變咗共產主義,要階級門爭,鬥臭你班大地主。

按佢哋啲思路,新界地唔可以發展,仲要做多啲農地,至於冇地又點解決住屋問題,呢啲佢唔理,你政府搞掂,你話要靠佢哋解決住屋問題,真係有好大懷疑。

發表意見