立場新聞 Stand News

松果體家長out喇,學原力先至係王者

2015/4/28 — 16:35

圖一:路克接受蒙眼感應訓練。

圖一:路克接受蒙眼感應訓練。

有人開班教细路開發松果體,話可以練到蒙眼感應。記者約個松果體專家叫佢啲學員做測試,結果當然係感應唔到。(蘋果:聲稱開發松果體 收費逾5萬 兒童腦訓練班 透視測試失敗)

好多人睇到呢段新聞就大鬧個專家搵笨,又嘲笑啲家長俾人搵笨。其實大家唔好太怪責啲松果體專家同埋松果體家長,事實上蒙眼感應係做到架,歷史上一位叫奧比溫嘅大師就曾經成功訓練一位農民少年路克,利用原力做到蒙眼感應(圖一)。後來路克仲出人頭地,做咗偉人。佢地嘅事跡被改篇成電影《星球大戰》。

如果學到原力,去面試嘅時候,小則可以睇穿試題紙,大則可以令個面試老師透唔到氣,咁就入硬心儀名校,名符其實做INTERVIEW之王。

廣告

不過,有原力專家提醒家長,原力訓練講求天份,唔好盲目相信坊間原力訓練班嘅宣傳。

後來我去睇下呢個松果體機構嘅Youtube宣傳片,真係喜出望外,原來佢地真係有用原力訓練器(Force Trainer*,圖二及三)!訓練原力,識用梗係用Force Trainer。將來香港出現絕地大師,絕對不是夢。

廣告

其實市面上吹到好大嘅激發大腦潛能班大把,只要你唔好吹到好似大陸啲特異功能人士咁,吹啲好似路克咁蒙眼感應呢啲有得俾傳媒驗證嘅嘢,淨係話會做功課快咗、溫書入腦咗就有生意架喇。

再唔係你整個廣告,影張相有個細路女好驚驚咁,嚇啲家長話你唔去搵競爭,競爭會搵你,好多人就會乖乖地俾錢叫個仔女學做INTERVIEW之王喇。

 

圖二:宣傳片中的原力訓練器

圖二:宣傳片中的原力訓練器

圖三:原力訓練不是夢。原力訓練器英文叫Force Trainer,響Amazon.com仲有得賣

圖三:原力訓練不是夢。原力訓練器英文叫Force Trainer,響Amazon.com仲有得賣

* 有關Force Trainer的原理,可參考相關維基條目

 

原刊於作者博客

發表意見