立場新聞 Stand News

「某人」言論,其實反映好多香港人的「核心價值」

2015/12/20 — 16:42

其實我覺得某人嘅個人言論冇乜好值得講,但令人慨嘆嘅,正正係佢代表住好多香港人,特別係我上一代及部份我呢代人所擁抱嘅「核心價值」,嗰種冇宣之於口嘅「獅子山下精神」,就係搵食至上,搵到錢就係「成功」,仲要識得走精面搵快錢、本小利大、「轉數快」、醒目、識攝位同左右逢源等(即係韋小寶嗰種)。

對於呢種人,不學無術唔係問題,我揸靚車住豪宅著 Versace,你吹咩?你洗版鬧我仲好,我唔係名人講嘢又點會有人理?破產更加係身份同智慧嘅象徵:唔係食大茶飯又點會搞到要破產?識得以破產方式合法甩身仲唔係醒?呢種人版,其實係唔少香港人嘅奮鬥目標同身份認同。

能夠造就呢種人成功「上位」(呢個 term 都好似係佢哋發明出嚟),其實係香港人嘅共業;而所謂「世代之爭」,並唔完全係呢代人與黃之峰嗰代人之爭,而係價值觀之爭,係「獅子山下精神」/香港「核心價值」與另類生活方式嘅追求/道德/普世價值之爭。

廣告

(原文刊於作者 facebook,標題由編輯所擬)

廣告

發表意見