立場新聞 Stand News

柯 P 太唔認識香港

2017/3/31 — 12:21

柯文哲話香港很無聊,沒甚麼好看,只代表佢唔識得欣賞香港呢個咁靚的地方。香港有乜咁靚?唔好話柯P,就算係香港人都未必知。

香港本身就是一個超級大型的主題公園。呢個公園唔需要卡通人物或者漫畫英雄做標誌,佢的特色隨處可見,但要細心一點先可以留意到。呢個和佢的主題有緊密關連。係乜呢?就是乜都可以拎嚟買和賣。由服務員的笑容到公共空間,到妳/你出街食飯點解要坐得咁迫夾,轉個身都撞到其他人,每一寸空間都用到盡,每一步都唔可以停留,慢半秒都被人miu嘴,所有呢啲野都唔係必然,唔應該係咁(起碼左膠會咁諗),而偏偏個社會越來越係咁,仲要大家被訓練到唔覺得有問題。作為一個遊客,如果識得欣賞香港呢個所謂城市,而實質係一個大商場的特色,佢的收穫一定好豐富。

商場有商場的美學,香港到處是商場,交通又咁便利,如果你嫌國際金融中心的Starbucks唔夠貼地氣,或者去得太多朗豪坊嗰間有啲悶,可以試下去APM嗰間,在不同商場飲同一品牌的咖啡,彷彿毫無分別但又好似有,好魔幻寫實(做人好多時都有呢種萬變不離其宗的感覺嘛)。事實上,香港周圍都有商場,所有商場都是starbucks、老麥呢類連鎖店公司。香港商場的特色就是無特色,問題是點解要有特色呢?去旅行都是貪爽,貪舒服架啦,而最舒服和方便的一定是去幫襯標準化/格式化的鋪頭喎。商場就是提供大量呢類商店的地方。呢個根本是一個大賣點,旅發局好應該向外大力宣傳呢種香港特色,我肯定無其他城市有香港咁有競爭力。

廣告

仲有,不得不提,拜領展所賜,呢個特色更加發揚光大,家陣連公屋商場都高檔化起來,變得和市中心的嗰啲商店集中地無乜分別。你話係味好正先?咁仲唔止,我地的商場基因連古物古蹟都入侵埋,最經典的是尖沙嘴前水警總部,可以完全改頭換面,變酒店和名店。保育都可以變商業項目,呢個是世界上絕無僅有,柯P其實應該要多啲來香港取經至係。

廣告

發表意見