立場新聞 Stand News

民建聯生仔。。。

2016/6/7 — 14:23

資料圖片:陳恒鑌

資料圖片:陳恒鑌

【文:Joey】

陳生,又係你呀?!

生仔血淋淋,陳太係咩狀況,外人無從估計。不過學林屈氏親子大作家話嘅:咪咩都政治化,比少少同理心,比機會佢解話聽住先,疑點利益暫歸被告。是否特權?等睇醫院調查報告吧。

廣告

網上群情汹湧,講到生仔好似食生菜:「胎盤前置咪開刀囉」,我以為落街市「切多廿蚊牛肉滾湯」咁啫...... 大佬呀,你班時事評論員,開過刀比人切過未架?

中国外長嗰句:未比人開過刀冇發言權!有點道理嘅。咪牙斬斬,個個老母生仔都有唔少驚險血淚史,之不過冇咩 blogger 係女人,寫返本《生仔這種邪教》諸如此類,數吓班老母十個月裡面外面、上面下面、切過剪過幾多刀、縫咗幾多針、甚至打過幾多「U釘」縫傷口,用咗幾多針線刀剪夾吸頭咁啫。

廣告

生仔從來是玩命。據統計,婦科女醫生自己生仔,選擇剖腹產的比率比一般高:可能日常睇得太多,驚險複雜 complications 命搏命,有朝一日臨到自己身上,情願萬無一失吧。

返屋企問吓亞媽:媽妳當年點生我出黎架?下次,咪打支流感針、抽血驗身就呱呱嘈啦。身體髮膚,受諸老母(係,個老豆其實做嘅好少),要孝順老母、更要錫亞囝亞囡個亞媽,日日都係老母/老婆節。

至於故事主角陳太,唉,衰在妳嫁個民建聯,民建聯撐高鐵港豬橋 cut 醫療開支,攪到公立醫院專科排到 2018 年!你老公跟住個大佬宗,耳仔窿生瘡都去打尖當急症犯眾憎,而家陳生講咩都冇人信囉,陰功!

切根、切鑌、切瘜肉!新事頭婆話:「政治好殘忍」。一句到尾,#有女勿嫁民建聯,冇人可憐架。

 

作者簡介:作為一個香港人,時刻發揮厚多士精神,生活上眼見怪事、錯事、愈來愈過份,一於插到佢暈!Never be afraid to say what you feel - You can only die once.

發表意見