立場新聞 Stand News

泰國公幹泡湯之舊文舊相(一)

2015/8/27 — 18:29

大樹凋零

原本今日成班同事出發泰國公幹,一早訂哂機票酒店,諗住可以一邊游水囇太陽,一邊扮吓嘢工作,?家臨時取消咗,要收埋條花碌碌泳褲囉,嗚嗚嗚!

今年三月第一次去泰國,遊埠原來咁疏干,又玩又食又可以他他條條寫文章,?家無哂mood,決定罷工抗議三日,post番幾篇舊文舊相算數囉,嗚嗚嗚!

廣告

************
三月四日
大鄉里出城遊記之一

廣告

呢度周街外國人,揹住背囊,攞住地圖,噚日係地鐡入面見到嘅,多過哂我係香港成個禮拜見到嘅,香港號稱國際大都會,相形見絀。

香港呢代普通家庭嘅細路,少見鬼佬鬼婆,撞口撞面大陸人,平日齋睇四個女仔三個bra加中文字幕西片,齋聽廣東話歌曲,年中讀唔到兩本課外書,英文書更加唔使旨意。長此落去,英文唔慌掂,中文吖吖烏,普通話麻麻地,中史淨係識康熙惡鬥曹操,你話將來點算好。

香港係咪從此大樹凋零,睇你哋後生一輩想點囉,睇你哋做人父母嘅有無身教囉,睇香港政府係咪齋噏多元發展囉。
改變由自己做起。

放假都講呢啲。

************
後記:
眨吓眼又五個幾月,唔該問吓自己,有無坐言起行?有無做過啲啲改變?有無睇過半頁書?有無識多一粒英文字?有無飛甩電視劇?有無醒咗啲?有無開心咗啲?再眨吓眼,又五個月,眨多幾次眼,就五年㗎喇。
提醒大家,2015年就快完,當機立斷,未為晚也,總好過等時後悔,自己同自己講:「早知今日,何必當初。」呢個世界,根本無「早知」。
自己的人生,自己負全責,唔好賴三賴四喇。

 

原刊於作者 facebook page

發表意見