立場新聞 Stand News

泰國公幹泡湯之舊文舊相(二)

2015/8/27 — 18:33

籃上的雞蛋

噚日去唔成泰國公幹,同事驚我心情低落,又怕我產生幻覺,專登約埋今晚一齊食番餐泰國菜,算係小小嘅心靈補償,欺騙自己去咗泰國。同事對我真係好到加零一,我好感激。

百無聊賴,睇番呢篇舊文,對照幾日前嗰篇爆到七彩嘅《四個口的高官》,百感交集。過去幾個月嚟,甚至十八年嚟,香港唔單止無進步,直頭退咗一大步,唔唏噓有鬼。睇嚟今晚要飲多幾杯泰啤,麻醉吓自己。

廣告

************
三月六日
大鄉里出城遊記之二

搭地鐵由朝搭到黑,居然見唔到半粒中文字,地圖、路標、購票機、詢問處,清一色象形文字+英文,遊客估估下,好似識睇咁款,包括我哋一行九男女。

廣告

一個亞洲小國,無標榜自己係國際大都會,街頭大把識聽識講英文嘅路人甲,舊年招待咗二三千萬遊客,來自中國嘅超過450萬,無刻意逢迎,無繁簡體中文路牌,無普通話廣播,齋用本國文字加國際語言,識得尊重自己文化,叻叻叻。

香港自誇係紐倫港(「講」就真),唔該學下啦,一味遷就遊客,慢慢就面目全非,四不像,變到唔似原本嘅香港。?家人哋除咗嚟買嘢有信心有錢賺之外,貪香港有寶咩,第時直接去巴黎米蘭紐約東京,仲使鬼嚟香港。一句講哂,香港無特色,遲早玩完。

知恥近乎勇,識寫個「醜」字就有得救,問題係港府、商家佬知唔知、識唔識啫。我懷疑。

************
後記:
內地旅客佔舊年訪港遊客77.7%,今年頭六個月77.9%,你無睇錯,係升咗0.2%,唔係跌咗,已經高到危險嘅水平,稍為有啲屎常識嘅人,都會擔心畀人揸頸就命,風水輪流轉,人哋終於嚟厭咗,或者外邊世界嘅吸引力又大咗,提早諗計分散風險,點會越踩越深,去到不能自拔嘅地步。

從來未聽過有人做生意,故意將雞蛋放哂喺一個籃上,仲要有咁多,放咁多,就算蠢,都唔會蠢得咁交關啩,偏偏就係香港?家嘅情況。

原刊於作者 facebook page

發表意見