立場新聞 Stand News

消防員性侵事件:封閉環境男性欺凌現象

2015/10/12 — 19:00

寇比力克電影《烈血焚城》(Full Metal Jacket)劇照,圖中係軍隊裡面的”blanket party”欺凌場面

寇比力克電影《烈血焚城》(Full Metal Jacket)劇照,圖中係軍隊裡面的”blanket party”欺凌場面

消防爆出性侵醜聞,震驚七百萬人之後,好多人討論究竟點解會咁搞法,又要打攪阿寶。

其實有性意味嘅玩法響男校、宿舍、軍隊、監獄、紀律部隊一啲都唔罕見,唔知點解好多人試過嘅Happy Corner係其中一種,再玩大啲會係除人條褲,再嚴重啲就好似呢次消防員咁。總體嚟講,就係封閉環境男性欺凌現象。

廣告

上述嘅地方男性居多,生活苦悶就鍾意搵嘢玩,而且因為權力結構唔平衡,好容易出現路西法效應,即係有部份人當咗自己真係話事人,有權隨時發起欺凌,當成班人一哄而上,就好似發咗癲咁圍攻一個人。呢啲嘢好多時係用嚟欺凌新人。不過,佢地可能會覺得係調教新人,類似入會儀式,捱得過就係自己人,之後再咁對啲新人(早前美國就有一單兄弟會嘅入會儀式搞出人命)。呢啲嘢玩得過火,就變成性侵,小則紀律處分,大則負上刑責。

成班人一哄而上搞一個人呢樣嘢,有部份人就算唔想加入都要加入,因為佢地唔加入的話,下次就可能變成被搞嗰個。呢個特懲基本上係所有集體欺凌嘅共通點。

廣告

以前冇手機,呢啲嘢比較少曝光,但而家完全唔係嗰回事。就算本身係friend 底,玩大咗,都要刑責自負,更何況係欺凌冇consent 嘅新丁?

(利申:我以前讀男校,啲同學之間其實玩得好癲,雖然遠遠未到消防級數,但如果當年有手機,都分分鐘出事。正如一個網上流傳嘅講法:“Glad We Didn’t Have Smartphones In High School”)

 

原刊於作者博客

發表意見