立場新聞 Stand News

消防處的「任何仁」— 高招市場推廣法

2018/11/6 — 12:49

「任何仁」,圖片來源:消防處片段截圖

「任何仁」,圖片來源:消防處片段截圖

話說今日(11 月 5 日)消防處出咗個記招,介紹呢位「任何仁」吉祥物,立刻全城瘋傳恥笑,一方面話佢似愛情動作片「透明人」、一方面段 Rap 又好洗腦、成段片又膠味甚濃,成為今日瘋傳的新聞和片段。我倒覺得,無論如何,它已成為了近年最成功的政府吉祥物了吧!

這個「吉祥物大戰」,其實有段故。話說政府沿用吉祥物推廣訊息之法已行效多年,但近年除了「大嘥鬼」跑出外,其他均慘敗。如果有興趣知多啲,自己往 Google 搜尋「香港政府 吉祥物」,你就會見到一大堆聽都未聽過的吉祥物(e.g. 度天隊長、社會資本十兄弟……咩嚟㗎?)而,其實「大嘥鬼」由 2013 年起就已經誕生,都是近幾年先紅。其實製作費又用咗,卻達不到宣傳之效,完全是浪費公帑。今次輪到消防處啦,咁點算好呢?

今次吉祥物的製作,足見消防處野心。最近小妹上 Marketing 課,導師有句說話很好:「不管白貓黑貓,捉到老鼠就是好貓」。應用在今次事件上,就是「不管認真定派膠,Catch 到 Sound Bite 就是好策略」。講真,睇完段片就知,呢個吉祥物根本就是「明明白白地派膠」(而且,反正「任何仁」幾咁膠,我地都唔會覺得消防同救護是膠㗎啦,影響唔到 Branding 喎~)你看?唔使俾大筆錢,全香港都瘋傳啦,簡直成功到爆!而,消防處找來羅蘭姐此等重量級人馬壓場拍片,已知今次「吉祥物大戰」許勝不許敗。另一方面,將複雜的 AED 程序用 Rap 唱出,仲要話咁快洗咗你腦,呢啲可不是高招的市場推廣技巧嗎?起呢個「派膠救未來」的世代中,「派膠」無問題,其實佢囉到 Sound Bite 就等於成功。坦白講,今次「任何仁」的推廣速度之廣與快,連「大嘥鬼」拍馬都追不上 — 那,不是完完全全達到當初的目的嗎?

廣告

只不過,「派膠」呢種行為,多多少少是「無品味」、「行為怪異」或者「品味有問題」的表現,一次半次搶 Fo 是還好的,但「長期派膠」呢件事則有點危險(不過坦白講,彼鄰的日本夠成日出埋啲騎呢到爆的怪招,大家又唔會覺得日本人無品味㗎喎……現象倒是有趣。但,我倒是怕長此下去,啲人寧願用「派膠」博出位都不用正正經經的策略,而致「劣幣驅逐良幣」,倒還不妙……)聰明的消防處,高招在「待續」的影片中,已見找來香港拳王曹星如繼續宣傳,單看十幾秒片段,風格完全截然不同,走型格路線。所以,可見消防處未必繼續「派膠」落去,而是先讓大眾留意,再繼續宣傳(我估是咁)。

講真,我想讚下宣傳團隊,宣傳急救訊息都可以咁創新,總好過一成不變啦。如果香港政府啲施政都有咁創新的理念,你話幾好呢(所以咪整咗個島出嚟囉,夠創新啦啩!)……

廣告

發表意見