立場新聞 Stand News

深圳高球會結業 豈有此理

2018/7/13 — 12:48

圖片來源:Now 新聞報道截圖

圖片來源:Now 新聞報道截圖

筆者日前看到一篇新聞報道,說深圳有高球會結業,引發苦主在涂謹申帶領下遊行到中聯辦要求介入,起初我是不相信的。大灣區滿布機遇,遍地黃金,做生意有賺冇賠,人人都發過豬頭,點可能有高球會結業呢?而更匪夷所思的,係依班苦主竟然係搵涂謹申鳴冤,跟住涂謹申又走去要求中聯辦介入添。點睇都係 fake news 啦下話。

再想一層,都唔係冇可能,除非個經營者同班苦主係廢青。大灣區發展咁好的機會都抓唔緊的,除咗冇競爭力、唔肯學普通話的港獨廢青仲會係咩人?而根據「搵錢交稅買樓 = 對社會有貢獻」的香港特殊相對論,依班做生意蝕錢的人肯定係對社會冇貢獻的人渣敗類拆白黨死飛仔,唔排除佢哋將來仲會喺中聯辦門口瞓街抗議,順便溝女。

但更令我覺得豈有此理的,係深圳政府對高球會結業竟然沒有伸出援手。高球會對一個城市發展係幾咁重要,深圳政府到底諗乜?嗱唔好話咩深圳仲有其他高球會,或者依家大灣區一小時生活圈去遠少少都得呀。阿水都知高球會係地位象徵,亦係商界秘交之地,仲可以培育世界級運動高手,神聖不可侵犯,冇咗就 this city will be dying,經濟社會市民健康同時崩潰被深圳追過玩 L 完云云,一個都不能少㗎嘛。

廣告

再睇多次報道以確認我冇睇錯,報道竟然話高球會結業係因為位處水塘隔離,深圳政府勒令要恢復成郊野公園。要郊野公園都唔要高球會?你個深圳政府真係蠢過隻豬,定係全心整死深圳?你望下香港,正確之選梗係要高球會唔要郊野公園㗎嘛。深圳簡直倒行逆施,違反人類常理,天地不容。另一篇報道話唔止依個,另一個高球會都面臨被深圳政府徵地拎嚟再規劃。我直頭怒髮衝冠憑欄處,咒罵佢黃天擊殺死全家。

 

廣告

原刊作者網誌

發表意見