立場新聞 Stand News

清潔管工之苦

2017/3/6 — 10:00

圖片來源:維基百科

圖片來源:維基百科

之前講過基層有免於被屌嘅自由,因為厭惡性工作,唔憂冇人請,但有鑊落嚟,潮流興問責,屌嘅第一時間屌管理層先,就算你想卸落啲細度,佢哋一句完美反彈:「我服從上司命令,唔服從我要收警告信」你咬佢唔食。

今時今日,仲有人以為清潔唔駛同人 deal ,但個客喺商場或者廁所仆街,你伙記講錯一句說話,你已經周身唔得閒,寫報告寫到你傻。而家好多公司行 ISO ,呢啲係指定動作。理論上,公司定期有培訓,個客出事教埋員工點應對,但華人社會,做得清潔,多數低學歷,甚至文盲,隨時講完唔夠兩分鐘佢哋就唔記得。

啲𡃁唔嗅米氣,搞隻鑊出嚟,除咗要孭,仲要幫佢哋擋,保住佢哋。呢行唔係高尚職業,難請人到仆街,炒到萬幾銀一個位都無人做,炒咗佢就自己做埋佢哋果份,換佢哋件衫,「御駕親征」。邊個話管理層唔駛做,淨係點人㗎?

廣告

而家成日流感,一個唔該有一個人病咗返唔到工,成個部門就踢晒腳。流動組都還好啲,班手足可以一個頂兩個,最慘駐廁工要交人頭,冇嘅又係自己頂埋。伙記捱義氣戴口罩返工可能仲仆街,火燒連環船,傳染多三四個,到時堅冧檔。

每一個地方,冇論讀書做嘢,總有人犯眾憎,就算冇,兩公婆有時都會嗌交啦!管工職責,除咗同上面 deal ,仲要協調下面人事關係。理論上,就算佢哋打交,打死佢都唔關你事,但第一,炒咗佢哋,起碼少兩個人用,第二,寫報告同上差館落口供,已經煩到你仆街。

廣告

冇錯,每一行業都有 fit 馬存在,令大佬少啲麻煩,但係咪真係咁好彩遇到呢?同埋 fit 馬隨時恃住自己 fit ,一言九頂,隨時控制唔到。

講完下面,到上面。每個行業都有辦公室政治,要喺裡面全身而退,唔係易事,呢樣唔駛講,但清潔面對既人數更加大,以倍數計。自己公司唔在講,仲有保安物管,全部都官嚟。所謂唔怕你官,最怕你管,一個最低下層軍裝 Guard 都足夠玩殘你。一個同你 friend ,另一個同佢唔妥,已經有排煩,面面俱圓好難喺現實出現。記住,乾唔乾淨,冇清晰定義分界線,要玩死你,易過借火。仲有,一個商場人流幾萬人次,一座樓百幾二百戶,個個都有權投訴。得罪一個,已經有排煩。

正常,負責乜嘢,合約白紙黑字寫到明,但每個行業都有俾人揼嘅時候,即使腦細,都要受客人氣。撞啱個客要你做合約以外嘅嘢,例如做鋪頭幫佢哋換埋光管,你冇得 say no ,因為結咗怨,第二樣嘢佢可以啄死你,有排唔得閒;你班細唔生性,又好自然哦你,話你係 yes man ,乜都應承人,又會話:「我哋做清潔乍喎!換燈?有冇搞錯?」應付上,又要安撫下,一個慘字。

我哋基層工人,放工就無壓力,但做管工要廿四小時 on call 。理論上,打完咭,關人鬼事,但實際上,個場有咩事,爆起鑊上黎,唔該你夜晚三點都搭的士返嚟,好彩嘅可以氹到班細嘅返黎同你癲,唔好彩嘅,又係要自己做埋。唔會咁啱?六合彩唔見你中。而家成日有「百年難得一見」嘅大雨,政府宣傳片都話經常有極端天氣。唔返嚟唔該你執包袱走人。有啲公司仲要加班冇錢。

做得呢啲位,好聽就係老闆同員工嘅 mediator ,唔好聽就係磨心。總有伙計啲糧唔啱數嘅時候,大公司有糧單列晒點計還好啲,細公司真係口同鼻拗,有時候真係個會計計錯,有時候條𡃁唔記得咗自己病假,乜都有。最慘兩邊都唔得罪得,耍個細嘅,佢隨時唔撈,會計部周身唔得閒,幾舊水未必會應酬你。細公司有時會計同人事係同一個人,得罪佢,唔駛旨意有運行。激到伙計發癲上勞工處,見埋報, headquarter 上大人一句可以卸晒落你度:「你唔識安撫佢㗎?」

所以嘛!做管工雖然每個月多兩三千銀,而且有雙糧,但果份其實係「傷糧」,上上下下,俾人搞到五癆七傷。唔係人人聽你枝笛。就算炒完人,好彩搵到人頂,熟手技工都起碼要一個月先識晒個場啲位置,班細既瀨嘢,一定搵你先。呢啲錢,我真係冇本事搵,就算搵到,賺埋都唔夠睇心理醫生,我都係繼續倒垃圾穩陣啲,話之佢一世溝唔到女丫。

發表意見