立場新聞 Stand News

港人生存輪迴,仲理乜營養?

2018/10/2 — 15:58

圖片來源:gram HK Facebook

圖片來源:gram HK Facebook

【文:彗心】

點解排隊買杯珍珠奶茶都會畀人話呢?不過,計我話,近來排得最誇張已經唔係杯奶茶,而係某間日本 Pancake 店登港,睇《蘋果》記者話要等 3 個小時先食到呀。係咪好冇營養?應該有營養過杯化學珍珠奶茶啩。3 個鐘,係咪好花時間?係。點解仲有人排?大概係因為香港人需要 relax。

香港人可悲,在於部分人日日營營役役,付出每日十幾小時,賺的可能係僅夠生存的金錢。有部分人仲放緊勞工假,少過銀行假幾日嗰隻呢,見人放假自己仲返緊工,內心真的不是味兒。於是乎,返工前後,買杯珍珠奶茶放鬆一下,叫做生存中的一點慰藉。仲講乜營養?今朝有酒今朝醉,明日愁來明日當。仲講乜時間?我唯一可以操控的時間,我甘心用來排隊買珍珠奶茶,買 Pancake。

廣告

其實,香港人,放鬆啲。

每個人都有自由、權利。權利係絕對,不受任何因素操控。自由係相對嘅,需要在不影響他人自由之下,先可以享受到。除非買杯珍珠奶茶,影響到途人;否則排隊買奶茶,真係我嘅權利,唔需要反省。

廣告

又如,我鍾意睇《延禧攻略》又如何?好記得大學時有教授講過,佢只係睇「拳頭」同「枕頭」戲。我諗下諗下,有道理,娛樂就係要放鬆腦部。有人鐘意睇 Netfilx,話佢深層次娛樂,我覺得冇問題的,只要你覺得呢種娛樂,娛樂到你就可以了,畢竟鹹魚青菜各有所好 — 只係睇唔慣好多人,鐘意將自己一套放諸四海皆準,認為我做就最好,你嗰啲層次低,好差。

點解仲要寫呢篇文,係咪證明筆者放唔鬆?因為我都地獄輪迴緊,我承認的。只係想同反省緊以後買唔買珍珠奶茶的人講:隨意吧。

 

作者自我簡介:放緊勞工假的 90 後看混局。

發表意見