立場新聞 Stand News

港鐵掠奪公有地罪證

2018/10/3 — 17:18

作者提供圖片

作者提供圖片

翻查小蠔灣地契,政府喺 1995 年嗰陣批俾港鐵過 2047 年做車廠,點解可以象徵式地價 $1,000 就擸咗 30 公頃土地,原因係佢做緊「公共用途」。

好啦,依家政府想用番嚟起樓,張地契講到明,你港鐵唔再只係做車廠,政府係理應可以直接收番(re-entry)塊公家地,賠都唔駛賠,直接用嚟起公屋居樓最有效率,起完留番下面個位俾佢泊車都仲得。

廣告

✽ ✽ ✽

廣告

依家呢?林鄭 10 月嘅施政報告放風,就話直情送咗塊地俾港鐵做發展商起豪宅,然之後話做「公私合營」,俾佢起私樓豪宅之餘都拎番啲出嚟做公營房屋,講到好似益咗市民咁,實際本身成塊地應該係市民㗎!

自從林鄭講過公屋封頂之後,政府對公屋嘅定義已經改變咗,依家連「首置上車盤」呢種補貼少少嘅私樓,都已經係叫「公屋」。咁你估港鐵掠奪咗塊公有地,成大堆佢哋豪宅盤,隔籬係起租住公屋、居屋定起扮公屋嘅首置盤?

30 公頃 = 1.5 個太古城
1 公頃 = 1,000 公屋居屋單位

政府成日話扮冇地,誘導啲人去支持佢填個千億人工島,但小蠔灣本身一塊咁靚嘅公有地,解決到咁多劏房同上樓嘅需要,你轉個手就俾港鐵掠奪咗去食大茶飯,咩嘢道理?

所以,根本就唔應該俾林鄭送咗公家土地資源俾港鐵,立即收番已經解決十萬人居住需要,錯用「公私合營」完全係一個極差示範!

 

作者 Facebook

發表意見