立場新聞 Stand News

港。講。竹

2019/3/27 — 18:39

作者 Facebook 圖片

作者 Facebook 圖片

昨日政府公佈沙中綫調查中期報告,令筆者記得獨立調查委員會在聆訊時的一段小插曲。

話說其中一位專家,說月台即使用竹竿代替鋼筋,亦不會影響其結構安全云云。

這篇報導一出,輿論哇然,大都說專家「有無搞 X 錯」。

廣告

筆者眼看報導,耳聽輿論,其實心裏面戚戚然。因為我本科土木工程,而當年大學嘅土木工程系院長嘅研究,正正係如何將竹應用到建築之上。雖然我讀書時好食懶做,絕對係教授眼中嘅問題學生,但係教授話竹作為一個可持續嘅建築材料,其實好有研究價值,哩席話令我印象深刻。即使多年之後聽到教授已仙去,我依然記得當日佢哩席話。

筆者翻查資料,證實竹嘅拉力 tensile strength 係鋼鐵幾倍之上,而以竹竿形式做建材的話,其受壓力 compression strength 亦真係抵得上混凝土(就好似一張紙捲成圓筒形可以承載好幾本電話簿一樣道理)。作為建築材料 — 竹嘅力度與重量比例非常之高。而且竹在合適地帶土壤中,生長神速,如果大量繁殖,又採集得宜嘅話,絕對比用木材來做建材更加環保。

廣告

當然竹作為建築材料,有其弱點,例如要加工防蟲防霉,太乾太潮亦會令其發霉或變脆,本身亦好易燃。最大問題係將超過一支竹枝連接,唔可以用釘 / 螺絲等,否則會爆開,要接合並唔容易。

歐美地區因為水土唔適合種竹,所以較少人用。但近赤道地區例如中南美洲,南亞等地方都好普遍。香港建築業搭建竹棚,簡直神乎其技。我見過成個會展外牆全部被竹棚覆蓋,大家知道此香港地標外牆呈波浪形,有凌空突出之處,竹棚卻可以貼牆而建,造工技術令人嘆為觀止。

由於各種原因,用竹來建築全世界真係買少見少。但近年隨著可持續發展趨勢,好多學者研究如何將竹加工成一塊塊竹板,竹本身又容易種又大得快,做出來嘅板又輕又好力,用竹來建築又成為潮流。

香港人成日話要本土。其實竹棚業可以話係最最本土嘅行業之一,但識貨者卻碩果僅存。

筆者畢業後從無踏足土木工程業,但願以此文為行業,以及離世嘅教授作僅有嘅致敬。

 

作者 Facebook

發表意見