立場新聞 Stand News

潮賣最平日韓貨辦 市集檔主「絕處」營生

2015/9/30 — 12:31

「人哋批發先做呢個價,我賣比街坊就無咩所謂,零售都係呢個價錢,打埋折比妳就無賺無蝕,呵呵。」 檔主唐財佳(唐哥)笑道。

唐哥的本職是中醫師,現位於同仁小販市集的檔口,是他家裡的祖業,後來由於母親年事已高,便由唐哥承繼,唐太幫忙打理,至唐哥正式接手,是三個多月前的事。逢星期一,唐哥都會閉店一天,到深圳醫院為舊病人診症,充滿善心的他更成立了「健康慈善會」,和其他志願者為有需要人士義診。

檔口主要出售日韓進口貨辦,貨源充足,除了一年四季都有售的牛仔褲,亦有「季節限定」的針織衫和皮褸。雖然貨品全是名廠出品,但價格只介乎港幣$29.9-59.9,相當實惠,不但吸引街坊光顧,亦有行家入手再高價轉售。

廣告

檔口中的牛仔褲款式齊全,由迷你短褲、短褲、中腳褲到長褲都有,有斯文的蕾絲褲邊款,亦有型格的破洞牛仔褲,不論顏色深淺、高腰低腰、窄腳闊腳只要向唐哥講出要求,基本上都可以覓到心頭好。選好款式,就到一旁的「貴賓房」,即以簡單支架搭建起的試身間試穿,再到試身鏡前一覽造型,選購過程方便又快捷。「依家最興嘅係窄身褲腳嘅修身款,妳睇雜誌韓國啲後生仔女都係咁着。」唐哥笑道。

廣告

唐哥的檔口位於同仁市集上層的邊緣位置,據他所言是全場的「死位」。的確,相對起下層,同仁市集上層的人流更少。有檔主反映市集正門入口前的樓梯斜度近乎垂直,莫說是行動有不便的老人家,即使是年輕人在這樓梯上落,也相當費力,令人望而卻步,不想走到上層購物。場內雖然有扶手電梯和升降機,但位置分散,亦沒有清晰指示,有街坊表示到同仁市集多次,都不知道場內有升降機。

檔口位置「邊緣化」,要「絕處」營生,唐哥除了掛上在鐵籠外也清晰易見的宣傳橫額,亦積極透過Facebook宣傳。「Facebook專頁係啲後生仔幫我開,擺啲相上去,等多啲人知呢度有好野賣。」到訪當日,檔口播着劉德華的「一起走過的日子」,唐哥和友人興致勃勃地談論着菲林攝影,亦讓檔口頃刻添了幾分懷舊的氛圍,但另一邊廂,從檔口的燈箱牌匾、電子投映時鐘,可見唐哥極會善用科技,亦樂於接受新事物,懷舊但不守舊。

唐哥為人爽朗健談,友人邀請他當「模特兒」,他沒有一絲「Camera Shy」。住在觀塘多年的他,重建前住在康寧道唐樓,受重建影響,檔口和住處都得搬遷。隔著鐵籠的網面,唐哥向市集外的地盤望去,若有所思、欲言又止地說道:「睇住佢大,唉。」口吻十足父母對孩子的嘆謂。幾年之後,地盤之上,將會出現四棟高級住宅。友人開玩笑地接上一句:「睇住佢壞,哈哈。」

 

 

▓店號:97 (日韓貨版全港最平)

Facebook

▓同仁街臨時小販市場(同仁小販市集)
地址:同仁街38號
開放時間:8am-10pm

原刊於作者博客

發表意見