立場新聞 Stand News

【無營養文化系列.一】拜託,唔好再狗衝排隊食食食打卡呃 Like 好嗎?

2018/10/3 — 14:10

資料圖片,來源:DaKub @Pixabay.com

資料圖片,來源:DaKub @Pixabay.com

要談「無營養文化」呢個現象,第一個排頭位的,當以「狗衝排隊食食食」及「打卡呃 Like」呢點莫屬。我之前都有寫過單獨關於「喜茶」的文,現以「狗衝排隊食食食」及「打卡呃 Like」一同討論,再撰文於此。原文有興趣者可睇番

近幾年,我發覺香港人越發鐘意排隊。由以前「邊間野好食就去排隊」到到「演唱會撲飛又去排隊」、連買個月餅都排一餐隊;排隊的時間亦從以前 10-15 分鐘,大幅增加至動輒一粒鐘,而最近有日本 Pancake 店於銅鑼灣開幕,竟要排 3 粒鐘先食到。而今年喜茶的登陸,亦成功讓呢種排隊風潮發揮到了極致。

自從今年由自由工作者身份轉為全職工作(即使我已工作多年……哈),我尤其感受到時間的寶貴 — 即使我幾準時收工都好,香港地一星期 44 粒鐘工作都是最低消費。放工之後無耐就天黑,時間根本就不等人地一分一秒的溜走 — 可以的話,我幾想每日都放假,做自己鐘意做的嘢。但,大家時間咁寶貴之下,卻竟然有一大班笨蛋、為咗跟風、排隊排一兩粒鐘都在所不惜。即係咁,排隊還排隊,都睇下嗰樣嘢嘅價值,值唔值得你排啦。為咗杯二三十蚊的嘢飲/百幾蚊的 Pancake,居然有大把人甘願排一兩粒鐘甚至三粒鐘。雖則話嘢食唔係好貴,但係你嘅時間一樣係金錢,講緊香港最低工資都 $34.5 啦;商家要人等咁耐,同樣嘥緊我哋嘅錢,咁點解大家又願意畀佢「嘥錢」呢?好明顯大家都係跟風啫。

廣告

利申,本人都飲過一次喜茶,當時在強國等咗大半粒鐘到,試過亦唔覺得好味到曉飛 — 咁點解我飲?因為老公想試囉,結果相都無影張,卡都無打。其實我都知喜茶要等好耐,但我總是覺得成件事好有問題,既然要人等咁耐,點解唔開啲分店、或者在沖泡方面加快速度?商人總是唔想得罪顧客,賺更多的錢,點解佢仍然要人等咁耐?呢啲好明顯亦是市場策略之一。

而最教我覺得神奇的,是大家竟然將「排隊排好耐」、「買到杯珍珠奶茶」同「好叻好勁好潮」掛勾(我心諗,你叻乜嘢呀?腳骨力呀?)。出現咗呢一種預咗要飲一杯茶、動輒排隊一個鐘以上,然後重點是打卡呃 Like 的風潮,已經完全感受到香港人的文化劣質化 — 香港人曾被英國統治,接受的那種英式文化素養與 Dignity 仿如蕩然無存(但我亦絕非祟英,只是就事論事,英國文化素養總比起強國後文革時代的禮崩樂壞好吧?!),剩下的只是一班港女(甚至港男)狗衝排隊,為的只是一杯無無謂謂的嘢飲/嘢食、為咗 Attention seeking、為咗 IG 留倩影……呵,原來係咁。

廣告

當我哋喺度鬧啲香港廢老對香港民主冇付出,我真係想問,新嘅一代呢種生活態度又有幾可以令到社會改變?當社會問題多如鴻毛,高鐵爭議、土地大辯論、沙中線沉降、中國假疫苗風暴等等在在影響民生需要,呢啲嘢卻完全提唔起公共關注,反倒係一杯完全無公共性可言的「黑糖珍珠鮮奶」、一間「喜茶」、一間「日本 Pancake」、就竟然可以令到新一代狗衝,成為網絡熱話,呢啲又係咩質素?

而我曾經寫過文章,談及 Why Not Both 的問題。即係點解我哋唔可以既追捧喜茶,又關注時事呢?最後我得出的結論是,很簡單,因為人的時間很有限,你追捧喜茶,排隊排一兩粒鐘,呢件事已經 Consume 你好多精神時間,咁你仲邊有時間理其他更有價值的嘢?(Sorry 我真係覺得關注社會議題的價值比起排一杯嘢飲的價值高……)而你大可死撐話「我排隊嗰陣其實係睇緊殷海光《人生的意義》呀你識條毛啦?」,但是會好好利用排隊一粒鐘做「較有意義」的嘢的又有幾多?有幾多是碌下 FB 打下 Candy Crush 傾下計又過咗?講到尾,香港人呢種盲目追捧認威、以為自己排到隊好叻叻豬、打卡呃 Like,表面風光實際膚淺嘅心態與態度,呢個先係有問題。

這個問題,其實有點複離,且看下回分解。

發表意見