我係薯條控

我係薯條控

為咗食好味嘅薯條,我可以去到好盡!

2019/7/22 - 20:20

特薯新聞報導

圖片來源:作者 Facebook

圖片來源:作者 Facebook

各位觀眾晚安,我係薯毛毛。

知道我真正身份嘅人,都知道我係住喺屯門,呢張相喺我啱啱喺屋企樓下間超級市場影返嚟。我喺屯門住咗超過二十年,就算打風落雨都未見過呢個場面。曾經我諗過政治同飲食係咪可以分開呢?經過咗昨日之後,其實根本就唔可以,如果社會唔安定,你想食嘢都唔會有得食。

我可以接受政見唔同嘅人,但係我接受唔到連人性都無嘅人。如果你覺得昨晚喺元朗西鐵站發生嘅事係完全無問題嘅話,對唔住,我想請你離開,昨晚發生嘅事基本上無任何一個位係合乎常理,合乎我哋生活喺香港嘅常理。

廣告

撫心自問,我對於呢段時間係咪可以安全返工,又或者安全返到屋企,我係存在好大嘅疑問,因為我唔知道宜家嘅政府係咪可以保護到我嘅人生安全。喺呢度特別想同元朗嘅朋友講對唔住,我諗我會有段時間唔敢 / 想入元朗去寫推介,因為我宜家對元朗同西鐵呢兩樣嘢都係感到極度不信任。

薯毛毛喺月尾會外遊大約兩星期先返香港,曾經諗過香港搞成咁,倒不如留返喺香港,但係,我發現自己真係太攰,認識我嘅人都知我係需要經常睇新聞,同埋更新資訊嘅人,我覺得我需要出去行一下,如果唔係我都唔知自己會點。

最後,再一次同大家講聲對唔住,我真係唔知幾時復工寫食評,本身國際薯條日當日我係想開始寫返,但係最後都放棄咗,宜家亦都已經無哂心機。但係,大家都無放棄我,都仲肯 Follow 我個 Page,薯毛毛再次多謝你哋每一個人。

呢節新聞報導完畢,希望好快可以再次見到大家。香港人,撐住!加油!

P.S. 補充一件事,就係 8 月 22 日嘅聚會係唔會取消,因為想去嗰個地方剩係 Book 位都要三個月前 Book。除非嗰個地方有其他通知,所以薯毛毛都只可以繼續去,希望其他五位參加者都會體諒。

 

作者 Facebook