立場新聞 Stand News

王維基 — 夢想的幻滅

2018/4/9 — 11:59

王維基

王維基

有啲人唔明白我點解咁㷫王維基放棄申請免費電視牌照,話佢辜負香港人。有人反應:佢都盡咗力啦、香港人辜負咗王維基就真⋯⋯其實我唔係㷫佢放棄電視牌照,亦唔係㷫佢放棄夢想,每個人有佢選擇嘅自由。我失望係佢無聲無息咁退場。

冇私怨,唔憎佢,仍然覺得佢同佢港視嘅 partners 係好老闆;仍然印象深刻佢同我哋講製作節目要有added value;仍然欣賞佢為行業帶嚟新思維;仍然記得佢堅持製作上嘅工業安全,雖然都幾多同事覺得個安全主任會妨礙製作;仍然感激嗰次意外之後老闆之一嘅冰姐並唔係追究責任而係關注我哋目擊者嘅心理狀況需唔需要輔導。

失望嘅係⋯

廣告

當時王維基不獲發免費電視牌照後,十幾萬人上街支持港視,如果當年留守政總立法會引用權力及特權法遭否決後,王維基出嚟同群眾講話佢失敗喇,當時就放棄嘅話,我諗香港人唔會怪佢,我亦唔會對佢失望,因為承認失敗亦係英雄氣慨。但係佢突然宣佈攞到個流動電視牌照,繼續司法覆核發牌不公,流動電視制式問題受打壓,更改制式符合政府要求,種種部署係向威權挑戰,佢講過電視係佢下半生嘅夢想,當時好多人對梁振英政府同社會上種種霸權嘅不滿,尤其是對一台獨大成為建制代言嘅不滿,投射喺佢「電視起革命」嘅夢想度。佢成功將自己營造成一個打不死不放棄嘅 idol,塑造所謂獅子山精神嘅代表,去唔同嘅大學演講,俾年輕人對夢想充滿憧憬;尤其是年輕學生以佢為追尋夢想嘅榜樣。一種精神因為一個人凝聚嘅話,呢個人其實已經孭起咗一份責任,唔可以隨便話退場。即係當年孫中山搞革命一兩次失敗之後話我唔搞喇去英國受政治庇護啦,支持佢革命啲人點諗?史書又點寫佢?

王維基當時借助嗰種氛圍創造出一種革命精神,成為 idol,竟然喺港人慢慢淡忘唔再追問當年行會同一男子黑箱作業嘅時候,淡出佢嘅夢想,而唔係出嚟刺激起大家嘅鬥志,我就覺得咁係辜負咗嗰陣「出櫃」第一次遊行支持佢嘅香港人。佢一直話係因為梁振英所以攞唔到個牌,於是走去選立法會都係主打拉梁振英落台。梁振英落咗台啦,咁係咩原因而家個政府都拖住唔批個牌俾佢?被逼放棄嘅話,係咪應該出嚟公開係公司力有不逮抑或政府有意刁難?點知佢唔聲唔聲咁放棄兩個牌照。

廣告

講返個電視夢。亞視冇咗個牌,繼續堅持做佢嘅電視,雖然我哋唔知亞視背後資金嘅agenda,但亞視真係不死。我個人冇錢冇人,都搵機會繼續當年港視嘅「夢」;港視落實流動電視牌照時向王維基建議過做賣藝節目,港視做唔成我將個 idea 向港台申請外判計劃,做成咗五集【一班人去賣藝】;為咗延續【飄 - 福島】未完嘅故事,搵私人贊助獨立拍咗套紀錄片【311 復興與再生】* 。王維基唔係冇錢冇物,當電視主流轉移向網絡世界嘅時候,佢連流動電視牌照都放棄,半生「電視夢」轉移去「網購夢」,咁我懷疑佢當初嘅夢想其實係賺錢唔係電視囉。王維基曾經俾人覺得可以為夢想去到好盡,原來結局就係咁。佢大學時期嘅老死陳健民、同戴耀廷就真係為咗夢想(民主)去盡,坐監都預埋!(我承認,係因為戴耀廷被批鬥陳健民主持4月7號晚集會後聯想起王維基嘅「電視夢」,爆呢篇牢騷出嚟!)

有網友話:王維基HKTV昔日嘅自家劇集即將回到大家眼前--【來世不做香港人】 本月中會喺奇妙電視 Fantastic TV 平日夜晚播映。

我都知,當日出呢個新聞我就話,王維基真係放棄電視啦!

我咁回應嗰位網友:So what? 唔係自己嘅電視台!香港人係咪話有得睇就得啦,唔需要理佢係邊個台?如果TVB買咗嚟播,係咪話,唔發牌俾HKTV有乜問題啫,都有得播,朝樣撐TVB 播HKTV劇集?

咁,或者有啲香港人真係只關心睇電視嘅自由,言論自由呢家嘢算個屁!嗰年港視不獲發牌14萬人上街,睇下上星期六晚幾多人出嚟?

 

*順便賣下廣告:我套【311 復興與再生】藍光影碟即將印好,接受預訂:https://www.collaction.hk/s/311revival/fund

發表意見