立場新聞 Stand News

生五個?哈哈哈哈哈

2015/7/10 — 18:51

家計會話生五個,可以組織到一隊籃球隊就最好喎!哈哈哈哈哈!

保險公司話:養大一個小朋友要三百萬,呢個係十幾年前嘅價錢,係可加無減機制下,王梓軒屈指一算,養大五個保守估計要一億!哈哈哈哈哈!

社會真係愈嚟愈反智,我以為唔去日本旅行睇少場戲月儲三千可以上樓已經夠離地啦,估唔到今時今日仲會有人推你生夠五個,唔好話離地,可以直接上月球!哈哈哈哈哈!

廣告

當全港都爭緊奶粉、幼稚園、小學、中學、大學學位時,推行N年小班教學都被資助限制時,真係一人生五個,到時學額點分配?唔好話推小班教學,到時小學已經用大學嘅Lecture式教學,一班由四十人變成二百人不再是夢想。哈哈哈哈哈!

住呢?一家人平均居住環境只有二百零呎,但二百零呎嘅樓已經成萬蚊呎,供得樓先?定養仔先?土地供應問題又可以配合到一家七口嗎?家庭入息中位數二萬蚊都唔夠,好想請教一下點養七口?哈哈哈哈哈!

廣告

生出嚟唔難啊,湊先難,五個小朋友,分分鐘同你跨區派位,東南西北中發白,打牌叫五飛當然爽YY,湊小朋友返學要去五個地方,朝早五點出車,應該都夠時間返學嘅,放工邊個湊?唔好問我?或者有老爺奶奶外父外母呢?哈哈哈哈哈!

咁延伸咗好多問題,四大長老住屋問題,如果四大長老有工返,當然可以自給自足啦,但如果佢哋退休喇,政府無全民退休金,生果金亦只係可以買下生果飲下茶,換句話說,你要俾家用,當四大長老的退休都要煩惱時,加埋五個小朋友,諗下都覺得頭痛。哈哈哈哈哈!

今時今日可以養得起五個仔女,唔係最好生養個班,而係最有錢個班,生仔你估唔駛錢啊?一人生五個,婦科做得切咩?做唔切點啊?排隊囉,一係你早兩年Book定兩年後嘅期生仔,一係你知道有咗喇,去排個兩年後嘅期,懷胎十月,點等兩年啊?忍住唔好生先囉,你班廢青唔係咁都要我教啊?捱吓都唔得?當年姓屈個位可能係屋企三十幾度、一手餵奶一手換片一手打文,然後用口咬斷臍帶自己接生啊!哈哈哈哈哈!

再唔係,你應該去拎綜援,一家七口綜援金肯定過兩萬,書簿費又有得減,小朋友又有iPad資助,讀大學又唔駛錢,最緊要係父母都唔駛開工,可以全心全力照顧孩子!一陣出雙糧、三糧,仲可以去個旅行添!哈哈哈哈哈!

生五個?真係人有多大膽,地有多大產!比大躍進更有見地!哈哈哈哈哈!

最有趣係個廣告,籃球隊?如果你茹苦含辛咁生咗五個,供書教學養大佢哋,最後見到五個仔走去打籃球?我肯定你會即刻痴線,香港地做運動員?諗起都得人驚!咪住先,唔好痴線住啊!家陣排精神科,要排兩年啊,都係個句,廢青們,痴線都忍唔到,點得啊?有個專欄作家痴咗線年幾,仲未排到期,佢仲每日辛苦寫文工作,幾勵志???哈哈哈哈哈!

哈哈哈哈哈!
哈哈哈哈哈!
哈哈哈哈哈!
哈哈哈哈哈!
哈哈哈哈哈!
哈哈哈哈哈!
哈哈哈哈哈!
哈哈哈哈哈!
哈哈哈哈哈!
哈哈哈哈哈!

生五個?Happy Friday聽到一個咁好笑嘅笑話,You make my day!

 

原刊於作者 facebook page

發表意見