立場新聞 Stand News

當黃仰芳成為「傑青」

2016/10/13 — 9:39

十大傑出青年選舉 facebook 專頁

十大傑出青年選舉 facebook 專頁

近期,新鴻基董事黃仰芳獲選為所謂「傑青」,成為網民茶餘飯後嘅話題。本人 facebook 不斷被佢嘅新聞洗板,網民謾罵譏諷之聲始起彼落。對於佢嘅人生經歷,佢係咪拜金,有無 sugardaddy ,其實我一啲都唔想知,亦唔明有乜好鬧。本來,喺香港呢個資本主義社會入面,一街都係名牌奴隸、樓奴、金錢奴隸,根本係一個常態。

呢位黃仰芳,只不過係芸芸眾生之中,一個相對可以叫「上到岸」嘅樓奴,被一班大孖沙擺咗上台,拎來做「成功」嘅典型。再經傳媒炒作,惹來一班未「上岸」嘅奴隸不滿,話佢拜金,話佢傍大款,又傳佢靠氹阿公阿婆炒倫敦金發達。最終結果,「黃仰芳」就成為網民嘅吹氣公仔,將自己積埋嘅怨氣,虛擬地發泄喺一個人,一個你其實唔識嘅人身上。

好啦?乜都泄哂出來啦? So ?黃仰芳一樣「上咗岸」,「未上岸」一樣未上到岸,住劏房嘅繼續住劏房,社會所謂「成功」嘅標準一樣無變,搵唔到錢嘅後生仔,返屋企喫飯照樣被屋企人話你「無銀用」。成條「樓奴方程式」,照舊有效,如太陽每日照上升起一樣。如果話黃仰芳有錯,佢最錯嘅地方,就係唔知乜叫「悶聲發大財」,赤裸裸咁將香港社會嘅「樓奴方程式」講出來。

廣告

現實太殘酷,奴隸們嘅心靈太弱小。你竟然喺人家傷口撒鹽,心理素質再強嘅人,都會被你搞到心理唔平衡。不過唔怕,我哋有網絡,我哋有 facebook ,有一個容許大家虛擬地羞辱對方嘅地方,正如無女友嘅宅男,可以上鹹網泄慾一樣。部份熱衷於議政嘅人,則可能識得研究一下,「樓奴方程式」是如何鍊成的。可惜,呢個問題太複雜,有啲人嘅腦袋又太簡單,結果答案通常都係呢三個:無民主、地產霸權、梁振英。

相比「樓奴方程式」,其實我更有興趣研究,「黃仰芳現象」背後嘅媒體生態。大家如果有讀報習慣,就會發現部份媒體,每隔一排就會製造一個網民公敵,或者拎一啲必定會觸動網民神經嘅話題炒作一番。話題方面,來來去去離不開呢幾瓣:港女、拜金、樓奴、怪獸家長、繁簡之爭、粵普之爭…傳媒一吹 dog-whistle ,一堆網民就會自動波跳出來鬧, facebook 就會被人洗板,萬試萬靈。

廣告

正所謂「有求先有供」,飯後需要話題,網民需要公敵,傳媒需要廣告。既然炒作話題可以賺到點擊率,點擊率可以吸引人落廣告,既然班網民冷飯炒極唔厭,被我做老總,都會不斷炒冷飯。在商言商,我哋真係不得不佩服,香港媒體人嘅市場觸覺。我只係唔明白,冷飯炒來炒去三幅被,點解大家仲會落疊呢?係網民太苦悶?係生活太逼人?我,唔知道。

發表意見