立場新聞 Stand News

痴鳩線中學校規巡禮(1)

2017/1/11 — 23:31

-前言-

呢個連載……

名義上,係講我讀中學時遇到嘅痴鳩線校規;
實際上,係講透過呢啲校規,我應用到乜嘢經濟學原理。係咪好撚有教育意義呢……

你要本住睇到一篇就多一篇嘅心態去睇,皆因本人連載多數爛尾,可謂「港版富奸」。

文中含一定數量嘅粗口,見到粗口會窒息嘅人唔好睇落去。

───

-中學校規-

我所寫嘅校規,未必係最痴線、最唔合理嗰堆,只不過有啲搞笑之餘,又可以用經濟學寫少少嘢咁解。校規,未必要係白紙黑字寫喺手冊/正式校規度,一啲建基於學校傳統文化或高層要求學生要遵守嘅規定,亦算係校規。

對我嚟講,99%嘅校規本身就係多撚餘嘅嘢。呢樣嘢我讀書嘅時候係咁諗、到今日我都係咁諗。為咗之後唔好寫漏,喺度講下會寫乜嘢先:

-早會全校一齊唱校歌(第一篇、第二篇)
-遲到抄校規
-低年班唔准出街食飯
-唔准喺街邊篤魚蛋
-尿飛(呢個真係驚天地泣鬼神,但未諗到點寫)

不過,大綱呀、經濟學呀呢啲嘢好死嘅,以後諗到乜就寫乜啦。

好咧講咗咁多廢話,可以開始……
.
.
.
.
.
.
.
.
.
.
.
介紹我間中學。

───

-我中學-

我讀一間慈善機構辦嘅中學,位於九西。大家唔使估(雖然有啲人會知),我唔會開校名。咁做係為咗留有空間等大家去想像某啲嘢。正如日本動作片嘅格仔咁,明唔明?波多野結衣都會將啲無格嘅影片打咗格再推出市場……就係咁嘅原因。

我讀中一嗰陣-講緊係1990s-校長係位慈祥嘅老人家。校長成日笑口噬噬(從來無人知佢笑乜春),為人隨和敦厚,講嘢好溫柔而具說服力。佢好人嚟,有親和力。據聞呢個校長都幾受老師尊重同歡迎-可能係因為佢就快咬糧,學校乜春嘢都唔理,將權力全部下放,由得啲阿蛇Miss學生校工自生自滅……

另外,校長有樣特殊技能:企喺度瞓覺。好多師兄開早會嗰陣企喺佢隔離,發現校長企喺度瞓著咗、仲扯埋鼻鼾,師兄叫咗佢幾聲,佢先如夢初醒……而家諗返,校長都有啲似瘦版嘅安西教練。

好景不常,中二嗰陣換咗校長,仲要係空降,唔係由校內晉升。換校長簡直就似香港個主權喺1997年7月1日移交咁,呢個轉變係學校嘅一個分水嶺嚟。

───

我讀嗰間中學,曾經何時都係Band 2尾嘅好學校嚟(當年中學分五個Band,最好係Band 1、最差係Band 5)。所謂「曾幾何時」,即係連我都未出世、麥理浩係港督嗰陣,哈哈哈哈哈哈。可能因為上任校長太過崇尚無為而治,乜都唔埋,學生嘅整體質素-成績同品德-不斷下降,到我入去讀嗰陣,已經成為Band3中游嘅學校,落後同區其他幾間名校,只係比同區嘅Band5男校好些少。

咁解要講學校band幾呢?因為一間學校「好唔好」,主要靠兩樣嘢:公開試成績同校風。

-公開試成績就客觀簡單,即係有幾多個比例嘅人會考夠分升原校,預科有幾多人唔使repeat。

留意,我講緊嘅只係夠分升原校同唔使repeat,唔係有幾多條A、有幾多人入三大。面對一班飢餓嘅災民,你要做嘅唔係叫佢食啲有豐富維他命C嘅嘢、同有豐富纖維嘅生果以免便秘,而係畀足夠嘅食物佢充飢。作為一間band 3學校,文商班升預科嘅分數分別係官方定價嘅9折同8折,結果都有大半班係外來生;中七三班90人,有超過30個入到大專(計埋當年未升格做大學嘅樹仁同教院),已經要去鴻星酒樓擺幾圍賀一賀。做人要貼地啲,唔好咁戇鳩咁講乜嘢三大(講明先,我係讀赤大嘅,吹咩)。

-校風又係乜嘢?校風者,學校之風氣也;最簡單就係學生喺校內同街邊嘅行為同品德。靠嘅係整體觀感同耳目相傳,唔客觀,一切只係感覺嚟。你放學搵六七十個學生去各屋村嘅馬路度扶阿婆過馬路,一年後包你校風一流。

你問,好學校唔係要計師資咩?師資呢啲就多鳩餘啦,你踢波分勝負係計入球定計角球?要目的(成績/入球)定手段(師資/角球)?公開成績好,你話知佢成班教師係弱能嫁啦。仲有呀,師資好,咁係個老師勁、讀得書多或者考試叻啫,究竟佢叻考試係咪等於教到好學生,我就非常懷疑。學校男女廁有幾多格,重要過有幾多阿蛇miss係碩士或者博士。

更重要,我觀察到一樣嘢:

-職業足球同籃球界勁嘅教練-足球界有費Sir、雲加、摩佬;籃球界有普波域治、積遜、戴利(Chuck Daly)等,並唔係一線嘅超級球星;

-相反,超級球星去做教練,多數仆街收場。你睇下馬勒當拿,上屆世界盃搞到阿根廷畀德國數;活塞嘅名宿湯馬士走去做紐約人教練,搞到隊波一塌糊塗。

-有冇例外?有,但好少。NBA喺1996年選出咗NBA史上最偉大五十名球員,當中只得Lenny Wilkens係有名有實力嘅教練(已退休;現時史上勝出場數第二多嘅教練)。奇連士文(堅一線頂級球星)、哥帥同安歷基(二線中游),仍需時間去證明。

一隊球隊成功或者失敗,有好多原因,但「叻嘅教練多數唔係勁球員、勁球員多數做唔到成功嘅教練」,呢個歸納錯唔到幾多次。博士教書,特別叻咩?博士做議員,質素又特別好?博士只係代表佢喺學術方面有成就、有天資,同識唔識教你學生,兩樣嘢嚟。所以你見到啲乜嘢博士生、拔尖嘅人走去做補習,你應該更加小心。呢啲人可能本身係天才,全部嘢望一兩眼就識,但佢未必會明解凡人如你我點會搞唔清楚箱內有四個紅波三個藍波抽八次每次放返落去然後抽七次紅波一次藍波嘅機會率係幾多,更加唔識教你。

除非你係天才,有時補啲普通嘅補習老師仲好(見《史詩式愛情》第二初戀有關補習嘅事);不過你係天才,仲補乜嘢習?

───

好咧,去返主線本身,學校換校長。

新校長嚟到,首先畀個下馬威你班友。佢一上任就有個幾無聊嘅要求:每個星期五早會之前,唱校歌。

咁講真,只係每星期唱一次,唔算離譜;之不過唔離諎,又唔代表我哋要接受。

星期五早會之前,全校千鳩幾人學生老師,就一齊企喺操場度唱校歌。呢個校長,你又不得不佩服佢嘅承擔、勇氣同厚顏,因為佢五音不全,仍然企喺嗰咪前面,帶領同學一齊唱。首校歌完全唔難唱,但佢試過唱到好似黎明唱<對不起,我愛你>咁走撚晒音。全校90%嘅人(包括好多阿蛇同miss)都笑鳩緊佢,佢依然面不改容、若無其事繼續唱落去。佢試過唔止一次入錯beat、唱錯歌詞,照唱,毫無違和感。連咁簡單嘅校歌都唱唔好、歌詞又唔記住,我作為一個凡人就睇唔出校長佢對學校幾有歸屬感。

雖然校長叫大家一齊唱校歌,但大部份人都係求其唱、細細聲唱、當係淨播MMO、哼住音樂,甚至乎只係一碌木咁企喺度完全唔唱。全校千幾人,認真唱嘅只係得一百幾十,結果聽落去無聲無氣,背景音樂仲大聲。

情形就好似香港電台第七台咁,播緊純古典音樂,完全無人聲。試過好多次,播完一次校歌音樂,校長唔服氣,大聲講:

「你哋唱得唔好,要再唱一次,唱到滿意為止……」

再下刪九億字屌柒我哋。後尾諗起,呢幕同食神叫楊師傅企對住花園道「嗌好好味呀」嗌到佢滿意為止,係一樣。

屌,咁咪再唱囉!你都低能嘅,你以為再唱,我哋班友就會屈服、唱好啲?係呀,咪多一百幾十人唱,其餘繼續敷衍了事。結果有日重唱咗五六次,再加埋讀通告呀、其他人講嘢呀,嗰日早會加時去到8:45先完,比原定時間遲咗25分鐘,第一堂幾乎唔使上咁滯。

做學生返學最中意乜呀?咪就係唔使上堂囉!企喺操場hea唱校歌,睇你個校長喺度發老脾,成功挑戰權威,比起上堂過癮100倍啦。原來唱得唔好,可以繼續企喺度唔使上堂,有着數喎!於是每個星期五,全部人好有默契咁求其唱校歌,務求校長要求重唱,令早會拖得幾耐就幾耐。

Incentive matters,呢個係我喺經濟學學到最重要嘅道理。你面對乜嘢誘因,就會有乜嘢嘅結果同反應。萬試、萬靈,不會錯的。

關於唱校歌,下一篇再講。
 

 

作者 facebook

廣告
廣告

發表意見