立場新聞 Stand News

的士加價的簡單經濟分析:邊個最想的士加價?

2016/5/12 — 11:17

(資料圖片;Uber Instagram)

(資料圖片;Uber Instagram)

城市論壇有幾個人啲發言真係好得意,例如「收入低,所以態度唔好,所以應該加價」、「的士收費太平,搭的士分分鐘平過坐巴士」咁。搭的士要平得過搭巴士,似乎真係要四個人夾份唔跳錶先有可能,但肯定唔係正常例子。

不過話的士收得太平,所以應該加價嗰個人,佢有佢嘅道理:的士加價,理論上可能提高到的士嘅收入,如果的士服務本身係處於供不應求狀態,或者需求彈性低(用人話講即係加咗價啲人都會照買嘅嘢)嘅話。

上面講嘅係的士收入,唔係的士司機收入。而家好多的士司機都係租的士牌,你估的士牌主會租幾多錢俾司機?

廣告

咁大約就係佢地估計一個平均嘅的士司機收入扣除成本,再扣除的士司機唔會棄租嘅淨收入之後嘅錢。傳媒報導話的士司機而家扣除成本同車租,大約有1.5萬收入。

點解1.5萬?呢個應該就係大約一個的士司機唔會轉行嘅基本收入,亦即係佢地唔轉行嘅機會成本。低過1.5萬,佢地真係可能會去做保安或者其他司機。

廣告

假設的士收入係I、油錢之類嘅成本係C、1.5萬呢個入息係S,咁牌主收嘅租金(R)就大約係:

車租(R) = 的士收入(I) – 成本(C) – 司機唔會轉行嘅入息(S)

如果油價同其他行業收入冇大升,C同S唔會有大改變。咁假設的士加價真係可以令到I上升,咁I上升就會令R上升。即係車租會升。車租升,個的士牌回報率升,咁的士牌又有得升。結果的士司機收入都係1.5萬,得牌主收入上升。

咁當然,呢個只係理論。其實有啲司機識比較做生意,例如佢地識用app搶客、有固定熟客、聯營做8折車隊等等,佢地嘅I會比其他司機高,減去成本同車租之後,月入會多過1.5萬。

咁至於Uber出現,如果真係會令的士難做到賺少過1.5萬,佢地就會轉行,結果牌主要減租。所以Uber出現,反對得最勁嘅係班手握大量的士牌嘅牌主。

利申一下,我有小朋友但唔想揸車(養車貴過坐的士),所以比較多坐的士。而家啲Call的士app其實真係好方便,真係幫到司機同客互相配對,而且其實真係搵車容易過Uber。不過,長遠而言,如果app真係提高到的士收入,結果都係牌主加租,的士司機繼續做佃農。

咁S=1.5萬呢個數點先可以提高?理論上如果司機轉行可以賺多過1.5萬,S就會提高。咁轉行做咩?可能真係Uber或類似服務嘅司機。

(我呢個分析純粹係平時同的士司機傾計加上睇報導嘅資料得出嚟,當中好可能會有錯或是漏洞,有的話請指正,唔好打頭就得。)

 

原刊於作者博客

發表意見