立場新聞 Stand News

的士業發展好扭曲,但司機一般都好人、友善

2015/7/8 — 13:27

資料圖片:rthk片段截圖

資料圖片:rthk片段截圖

【文:羅健熙(民主黨南區區議員)】

UBER、GoGoTaxi、快的,我都有裝,用得最多反而係快的。我完全同意的士業界有好多問題,用呢啲apps最大既原因,通常都係兩個原因:一係知道繁忙時間/交更時間難截車想有個預算、二係要過海。

繁忙時間難截車,同繁忙時間逼巴士/逼地鐵係相同原理,人人逼埋一齊返工,截唔到車真係冇辦法怨人。

廣告

交更時間難截車,大佬,咁餐廳都有落場時間、我放工都想休息,人地放工都想休息,交更抖下打下牙骹咁,我覺得冇乜問題呀…

過海的問題,我其實某程度上已經當咗市區的士係有「九龍的士」同「香港的士」兩個類別,自從政府整咗「過海的士站」之後,呢個分野就更加明顯。我如果要過海,又冇call車,通常上車前都會問問司機過唔過海,唔過就無謂勉強。一般而言,日更搵車過海真係頗難,夜更、假日就十架有八架都肯過。

廣告

至於司機態度,我遇到的一般而言都還可以,好少惡言相向。一嚟可能我一開始已經冇咗過海唔過海個問題,二嚟我搭車通常都有散紙,冇既都會上車後同個司機講聲,睇下有冇得打散或者路過櫃員機撳機。

駕駛態度亦如是啦,職業司機個個唔同,大部份都合理駕駛。軚盤前面一堆電話唔算恐怖,佢一路行車一路篤手機先恐怖,不過都唔夠以前邊行車邊用筆寫低啲客電話恐怖。

的士業界要唔要自救,一定要。起碼付款方式已經冇可能齋用現金,信用卡、八達通已經咁多年、又咁常用,大陸支付寶、WeChat都已經好普遍,但極大部份香港的士仍然係連八達通都冇。呢個一定係不思進取。

用快的其中一個好重要既好處,係佢車多同有啲車既GPS、可以SHOW到佢喺邊,CALL車前大概知附近有冇車,CALL到車一路望住架車喺邊度嚟緊,知道大概幾時嚟到,總好過我CALL台然後佢就咁講句話5分鐘。

的士業界班友出嚟抗議人地服務齊全過佢係唔抵爭,但我日常生活接觸到的司機,一般都係好人、友善(粗口係會多啲但我不太介意),不想鬧埋佢地。

成個的士業發展其實好扭曲,車主牌主啲衰嘢其他人講好多,我完全同意而且之前亦都寫文狠批過;我覺得有司機打折頭其實本質上不是壞事(但當然係犯法);我覺得為環保同路面交通考慮應多鼓勵泥鯭的(其實即係做 Car Pool,但而家都當然係犯法);貨van載客印象中係由機場開始,呢個係實際需求(一家四口一人一隻喼點上的士),未來點再理順其實都要諗諗。咁多年來,人口不斷增加,巴士、小巴、的士牌照就一路都冇乜點加,呢樣都夠衰了。

不是交通專家,只因工時長、搭的士相對較多,有呢啲感想,有錯歡迎糾正。

發表意見