立場新聞 Stand News

相人

2017/6/22 — 19:42

面相算命 l 資料圖片 l jacob jung @ flickr —Attribution-NoDerivs 2.0 Generic (CC BY-ND 2.0)

面相算命 l 資料圖片 l jacob jung @ flickr —Attribution-NoDerivs 2.0 Generic (CC BY-ND 2.0)

做咗咁多年生意,睇錯過好多次人。一路以嚟錯得多,反而累積多咗經驗。依家,我依然成日係錯,但總算冇後生嗰陣錯得咁離譜了。

「齋睇樣,憑感覺」係年輕時候嘅睇人準則。唔知點解,後生嘅時候總係覺得自己懂得靠個樣就識得睇人,仲要唔知點解咁鬼自信心爆棚。「需無過犯但面目可憎」係我嗰陣相人時嘅座佑銘。之但係,「樣衰」嘅定義人人唔同,正如時不時有啲韓國小白臉我覺得好樣衰,但我老婆卻話幾靚仔咁…但實情係,一直以嚟我老婆相人其實都醒過我的。睇樣相人,其實唔駛講都知準確度其低,但係,呢個卻你同我同大部份人最常用嘅睇人技倆。結果呢?嘿。

後來老咗啦,慢慢發覺,睇乜都係假,反正你唔係睇相佬唔知個相點先叫做信得過;最有把握嘅方法,還是睇佢以前做過啲乜。心地ok嘅人,即使樣衰又好,態度又唔知點解乞人憎又好,即使做過衰嘢通常總有點底線的。每個人都總有一點dirty laundry,講過一些違心說話,做過一件半件,自以為唔會「影響大局」嘅衰嘢。講這些話,做這些事,做嘅時候總係半推半就,又或者自覺身不由己…最後變成助紂為虐的一份子。但這些我認為「還算係好人」嘅人,做過這些事情,日子久了,遠離風頭火勢之後,通常也會願意承認自己曾經衰過,亦多少會有點後悔。衰係衰架啦,不過,你總feel到佢其實多少係被動嘅。

廣告

有啲人,卻係堅衰的。你細心留意,你會發覺佢地所做嘅衰嘢,總係自己主動去做的。佢地唔係為勢所逼,而係自己「選擇」去做這些仆街嘅事情。至於佢地嘅解釋,亦慣性地會將事情美化,將嗰啲明明係為咗benefit自己嘅仆街事,美化成一件又一件好似好L有理想,有願景嘅事情。再仆街啲嘅,仲會強調,自己唔係真正受益者,我咁做都係為咗阿邊個邊個。以前後生,好多時真係會被呢亭語言偽術騙得到的。但這些人渣越見得多,越發覺佢地真係一個倒帽咁倒出嚟的。佢地以經慣性將自己做嘅仆街嘅事情,包裝到好似去拯救地球咁偉大,而後悔嘅feel係絕對唔會表現出嚟的。

這些人渣,總習慣將身邊人出賣。出賣完之後,仲要話對你好,幫緊你。佢話,做人總要冒一點險才會有收成,所以,佢好心替你做主,幫你選擇咗去冒險。結果呢?險由你冒,收成卻響佢身上,然後仲會扮返個大好人,同你講點樣塞咗錢入你袋。你身邊,有冇呢亭人?

廣告

最心寒嘅人渣,係會出賣埋自己屋企人的。自己仔女,自己兄弟,自己老豆老母…學似阿咩咩廢柴局長話齋,我見過,我真係見過。

我估,其實你都應該見過。

 

作者 facebook

發表意見