立場新聞 Stand News

真係打咗去金管局問點樣可以申請複印港鈔

2018/6/5 — 22:31

圖片來源:作者 Facebook

圖片來源:作者 Facebook

(利申唔係電影人,只係有好奇心)

最近印電影道具鈔票單官司引起全城熱話,政府好多政策、法例無法與時並進,人所皆知;但最羞家嘅係,有時條法例或規定係落後或者隱閉到無人理,竟然要檢控人先搬番出嚟用,就等如條盲腸唯一用處就係令你有盲腸炎,簡單嚟講係多舊魚。

問過做電影行業嘅朋友,全部都話無申過講。當然你都可以話,佢哋唔申請係懶或者明知故犯,但大佬,做影視最講求彈性同埋限米煮限飯,好多程序都希望簡化,令佢哋 work load 無咁大,你估個個都有荷里活咁嘅 budget 唔洗搬去太空都有個星戰做到出嚟咩。(順帶一題,政府有個 FSO 電影服務統籌科俾電影從業員申請牌照,例如制服呀場地呀之類,都係無仿印鈔的)

廣告

所以,噚日我就上金管局個網,搵吓有無電話可以俾我打去申請。結果,搵云成個網都無呢嚿嘢,我就搵 general 俾人查詢嘅 hotline 打過去,駁嚟駁去,再揀吓廣東話呀來來回回,搞咗十分鐘先真係有把人聲可以俾我問嘢。

咁我就開門見山同佢講我想申請仿製紙幣,因為見到單官司就想了解一吓,唔想誤墮法網。咁嗰位哥哥都好好態度,叫我將「姓名 機構名稱 聯絡方法 地址 拍攝目的 面額&數量 發鈔銀行」發去金管局個 email,咁我見咁多資料都有啲複雜,我就問佢有無表格填啦,唔想記低咁多嘢。

廣告

佢!竟!然!答!我!無!表!格!填!我心諗:你開放一個系統,人哋唔申請會有機會坐監,你竟然連張表格仔都無?咁我都覺得算啦,就手抄低有咩資料要 send。之後我就問仲有無咩程序咁,佢就同我講話要搵發鈔銀行傾版權。然後我再問咁警方呢?報紙好似話要同警方傾點樣印同埋做紀錄、銷毀嗰啲。佢話無錯,係要嘅,不過上述兩樣嘢,麻煩自己做。

即係如果你想申請,首先係無 form 填,自己 send email 去講低以上資料,拎咗金管局書面同意,然後再搵相關銀行傾版權問題,再搵警方夾吓點樣銷毀嗰啲樣本。我問有無機構/單位統籌㗎?無!整個流程大約要幾耐時間?又唔知!要搵警察咁要搵邊個部門?噚日話負責個同事行開咗,到今日都未覆到我。

所以,你話誤墮法網有幾容易,複雜到咁,真係申請咗都唔知係咪申請到。


#各位電影同業都可以分享一下經驗喔

原刊於作者 Facebook

發表意見