立場新聞 Stand News

「睇新聞要留意埋個資料來源可唔可靠?邊有人咁無聊架!」

2017/5/30 — 1:07

資料圖片(Roberto Trombetta @ flickr (CC BY-NC 2.0))

資料圖片(Roberto Trombetta @ flickr (CC BY-NC 2.0))

有關長輩相信 fake news 呢個問題,坦白講我寫嘅時候又冇諗過個 focus 係喺政治嘅事情上面嘅。政治立場反正個個都唔同,佢地從一段即使係真嘅新聞,所得出嘅理解同我地都未必一樣。佢地信啲乜,afterall都只係一個意見,我反而好少理。然而我收得最多而又最反感嘅 message ,係佢哋經常 send 出嚟,從 content farm 老作出嚟嗰啲甚麼「保健偏方」,教你點樣有病唔去醫但每日走去食幾斤大蒜之類嘅嘢。

大鑊係,啲長輩真係走去跟,有病,真係唔去醫。到你好心提醒佢要小心呀,唔好亂信啲網上假料揾自己條命嚟較飛嘅時候,佢鬧返你唔識嘢兼叫你收皮。

講真,政治新聞在這些群組裡面,冇錯係會衍生出一種意見和立場出來,但立場難分對錯,即使在我覺得佢地幾錯都好,講到尾大部份都停留響打咀砲嘅層面,後果唔會太嚴重的。後生嘅入得(或被加入得)呢啲 group ,預咗會聽到啲唔啱聽嘅意見,完全冇癆氣嘅必要。但有好多資訊,在這個年齡層係會 trigger 到佢哋嘅即時行動,而呢啲行動,可以係好傷害性的。

廣告

*****

有朋友話,後生仔都一樣,會俾呢啲 fake news 昆到,唔關年齡事。咁,可以肯定嘅,係每一個年齡層都必定會有人被昆,但我諗,被昆嘅比例,係有明顯分別。後生一代對社會嘅信任,其實好少(有時我覺得甚至係太少),佢哋會比較傾向慣性地「唔信任」聽返嚟嘅資訊。同樣呢個慣性都可能係先入為主,但呢種不信任,反而會幫助減少被昆到嘅機會。

廣告

另一個我比較有感受嘅,係即使被騙了,當事人對嗰段 fake news 嘅相信程度同反應。假設我相信一段網上資訊,大部份嘅情況,都係睇完就算,好少會因為睇完某段資訊而有實際行動的。但長輩們對這些資訊嘅沉迷程度,好多時都會超乎我想象。就好似之前講,嗰啲叫你得大病都唔好睇醫生,淨係每日食幾斤大蒜嗰啲所謂資訊,佢哋會義無反顧地去以身犯險。類似嘅 case ,我見過好幾個了,好堅持,邊個都勸唔到,好恐佈。

後生仔接觸嘅資訊,似終係比較多同快。一啲錯誤嘅網上資訊,你可能一時三刻發雞盲地相信了。但呢啲 fake news 通常又好快會響網上面有人將佢踢爆,只要你 keep 住 online ,發雞盲一般都唔發得耐,總會響唔同嘅渠道收到修正嘅訊息,從而知道早兩日自己原來柒咗。長輩上網嘅渠道,其實來來去去都係嗰一兩個自己友 whatsapp group ,一單 fake news 傳咗入嚟,大家信咗,唔知要等幾耐先有「修正」資訊再傳番入嚟,於是永遠停留喺錯誤資訊嘅階段。上個星期,我同其中一個 whatsapp group 裡面嘅長輩見面,碰巧要食飯了。我話是但啦,就前面果間快餐拿拿臨食完算啦,點知佢同我講:「阿橋,有冇搞錯?你冇睇 whatsapp 咩?呢間連鎖快餐啲菜,福島嚟架喎!你哋啲後生真係唔知個死字點寫。」

我同意有朋友留言所講,長輩要懂得面對互聯網資訊,其實要教的。問題係,有幾多個長輩會真正認為自己係需要學呢?我嘗試過客氣地提醒佢哋,兼且拎出証據,去指出某些佢地相信並互相傳閱嘅資訊並非真實嘅時候,佢地大部份都係相當 defensive ,而且會反指我呢個後生仔(只係相對地後生過佢地…)嘅提醒係多 L 餘。

「阿橋,你唔好咁多餘啦。睇新聞要留意埋個資料來源可唔可靠?邊有人咁無聊架!你都肯定唔會啦下話。」

真實對白,問你死未。

 

(標題編輯所擬;原刊於作者 facebook

發表意見