立場新聞 Stand News

研究不是用來包裝、護航與鎮壓民間意見

2017/10/23 — 19:59

今日有個研究智庫,成日將出賣公屋當成解決房屋問題嘅萬靈丹,每次嘅研究報告都推銷番同一樣嘢,每次大家都當佢係新嘢咁又講多次。最慘係裡面啲爛鬼經濟學佬腦筍都未生埋,周不時歸咎於樓價貴係因為佔中同離婚,當場聽到都真係笑爆嘴,但係香港嘅房屋政策思維卻係俾班咁嘅人操縱著,真係唔係幾笑得落。

其實有關土地問題講左咁耐,大家攪清楚未,依家大家嘅房屋問題係啲付出嘅房屋成本太貴,唔係要你逼我買樓上車呀,你要拎哂啲公屋一定要買先有得住,以後冇得再平租,咁係變相加劇左市民負擔嘅房屋成本,減低嘅係政府嘅房屋開支承擔,而唔係大家嘅居住成本呀!最後啲公屋又賣左出私人市場炒,個end user又係貴買番嚟,咁最尾啲樓都係繼續貴。

所有人都睇到你成個智庫親地產利益同親政府嘅背景同立場,地產商同政府講乜你地就講乜,又係度夾埋一齊推公私合營平補地價,咁你不如直接抄番份施政報告咪得囉,重駛鬼做研究?

廣告

成個報告重花左一大章用嚟招呼我地,講句多謝先,但你斷章取義咁拎左幾個case出嚟話啲閒置地、丁屋地好零散,自己又唔係做全面研究,鬼唔知有啲閒置地係唔適合發展呀?又唔見你個報告講下當中有咩政府地適合發展?唔講下粉嶺哥爾夫球場?短租富豪地?去左邊?

你為左打倒民間聲音同可能,突顯大家冇得揀一定要跟政府嘅方向移山填海,竟然花咁多時間去研究啲發展唔到嘅地,而唔係研究有啲咩地可以點發展,可謂殺得眼紅走火入魔。

廣告

研究本身最大嘅價值就係用嚟開創、啟發同構作可能,而唔係用嚟包裝、護航同鎮壓民間意見。希望各位研究者引以為鑑,唔好學壞手勢咁做研究,唔係嘅話你唔好講你自己係做緊研究,唔該。

 

(標題為編輯所擬;原刊於作者 facebook

發表意見