立場新聞 Stand News

「科大划艇隊教練 vs 火炭大排檔」事件的教訓

2015/7/14 — 13:03

Facebook截圖

Facebook截圖

「科大划艇隊教練 vs 火炭大排檔」事件,老實講,其實兩邊都唔係啱晒,不過好多人take咗side之後就講到上晒頭,一係就鬧大學生乜乜乜,一係就鬧人鬧大學生乜乜乜。

成件事其實就係po上網嘅人將件事講大咗,事件嘅關鍵係3倍例牌價錢果幾碟餸,其他人頭飯、飲品、本身價值不菲嘅大鱔都係明碼實價。個教練本來嘅post除咗批評個大排檔收三倍價錢,仲有話四十幾人埋單要成萬蚊有問題。事件引到傳媒追訪,先知原來叫咗一百四十幾碗人頭飯、四條大鱔,跟住每人二百幾數其實唔算唔合理,然後再有檔主嘅訪問反駁,跟住場火就燒番去po文嘅人身上。

廣告

而家科大划艇隊罕有地出聲明解釋,話「點菜時我們沒有追問「加大」的真正意思,實屬大意疏忽」,其實都係認咗衰:點菜嘅教練聽到伙記話「加大啲餸」(此說法出現羅生門,因為《太陽報》報導話檔主指「該批學生每個餸均要求三倍分量」),個教練唔問清楚點計就同意,結果原來係三倍。其實點菜嘅教練聽到個伙記話「加大啲餸」嘅時候,佢expect加大幾多?加幾多錢?呢點佢絕對有責任問清楚。

不過,如果划艇隊講法屬實,即係個伙記話「加大啲餸」,咁個伙記其實絕對有責任講清楚,邊會有人知道「加大」即係三倍計?假如係個檔主講法屬實,係個客要求果幾個餸加大三倍的話,咁從網上圖片所見,佢收人三倍錢,係咪有三倍份量實在成疑,呢一點似乎有人涉嫌側側膊唔多覺。出去食飯,成日都會出現呢啲情況,所以一般人去唔相熟嘅中式食肆,都要打醒十二分精神。

廣告

一件咁嘅事變成新聞,po文嘅教練仲俾人起底開工作地點名,我估佢自己都冇諗到會係咁,而最後仲要個划艇隊解畫。呢個故事教訓我地至少兩件事,第一,上網鬧商戶經營手法唔係唔得,但要預咗案情會俾人抽絲剝繭去分析,亦要預咗可能會得出相反結論同埋批評,所以唔好一時意氣,響道理唔係完全響自己一邊嘅時候將指控講得太死,你po上網做控方,就一定有機會被審番轉頭;第二,出街食飯,真係要問清楚價錢。

事件源自上圖。Po文的人名和相片已遮蓋。雖然原po已刪除,但要討論事件實在不可能不引用此截圖

事件源自上圖。Po文的人名和相片已遮蓋。雖然原po已刪除,但要討論事件實在不可能不引用此截圖

 

連結:

科大划艇隊聲明

Topick: 加大餸要收3倍錢 點分例牌與加大?(呢一篇嘅分析做得幾好,而且教識大家一啲中式食肆術語)

太陽報:網傳大排檔萬元埋單 被指黑店女東呼冤 (呢篇報導一出,成件事更加羅生門,而場火開始燒番去個教練度)

原刊於作者博客

發表意見