立場新聞 Stand News

穿皮草惹爭議 葉劉:唔覺有問題 養Mink可能比養雞養牛更人道 

2016/1/27 — 18:42

立法會議員葉劉淑儀今日身穿皮草開會,指皮草來自飼養動物,又向媒體表示「farm animal和食牛肉差不多」,引起爭議。葉劉淑儀會議廳外接受本網訪問時,認為批評者不了解皮草業已經改良,不涉及虐待動物,又強調吃牛肉不環保是事實,「唔好以為著皮草就唔環保,食牛肉都可能唔環保」。她續稱,「時代已經轉咗。其實養殖Mink可能比養雞養牛更人道,個潮流已經轉咗,佢哋(網民)唔知咋嘛。」

記者問葉劉淑儀如何回應網民批評,葉劉主動提及「環保」概念:

我要解釋吓。我意思係話,其實食牛肉都好多人認為唔環保,因為畜牧業產生好多溫室氣體,亦有美國紀錄片講美國養雞業、畜牧業都係不人道。所以食牛肉都可能係不環保,其實美加嘅養殖皮草,係養幾百萬隻,而家已經係環保,有埋網頁Fur is Green,時代已經轉咗。其實養殖Mink可能比養雞養牛更人道,個潮流已經轉咗,佢哋唔知咋嘛。

其實食牛肉好唔環保係事實,因為養牛係產生好多溫室氣體,放屈、打嗝都係產生溫室氣體,做牧場要斬好多樹,好似南美洲嗰啲……唔好以為著皮草就唔環保,食牛肉都可能唔環保。

廣告

記者追問為何現時穿皮草會更環保,葉劉淑儀又稱自己不評論環不環保,但不認為穿皮草有問題。

我唔討論環保呢個問題。我以前喺貿易署做咗好耐,香港曾是皮草產品出口的No.1,入口很多北美、歐洲皮革,我的工作包括支持皮草貿易,咁囉。所以我唔覺得有問題。因為如果你禁咗呢啲,好多人失業,加拿大喺養幾百萬(隻),一個省都養幾百萬隻Mink。

廣告

葉劉淑儀過往多次在公開場合穿著皮草,擔任保安局局長期間就曾受到動物組織批評,據報道,她當時的回應是「佢冇權侵犯我人權!」2007年,時任特首曾蔭權太太曾鮑笑薇因穿皮草引起爭議,葉劉就曾為其辯護,向反對者言「如果咁愛護(動物),不如食齋吖!」

發表意見