立場新聞 Stand News

窮人真係流淚行勝利道

2015/5/6 — 20:52

圖左:味芳餐廳 (味芳老闆鍾偉豐提供圖片),圖右:勝利道一號 (維基百科)

圖左:味芳餐廳 (味芳老闆鍾偉豐提供圖片),圖右:勝利道一號 (維基百科)

【文:道德偉】

以往行勝利道,通常為了去勝利小廚食海南雞飯,最喜歡勝利道旺中帶靜。不過,近年行過勝利道,發現有點改變,有啲離地,尤其那幢叫「勝利道一號」的高樓大廈,怎看都覺得篤眼篤鼻,格格不入。

後來,我才知道勝利道一號好架勢,最細單位實用面積僅226 呎,客飯廳呈三角型,是港產畸形奇則之典範,最近成交呎價,超過1.7萬元,226呎實呎賣390萬元,首期我都畀唔起,樓上特色豪華單位,一個名叫「貴冑芳華」,一個名叫「都市魅幻」,極為騎呢。

廣告

類似舊區變豪宅的重建計劃,陸續殺到勝利道附近,例如田生、恆基,老早買起勝利道一帶舊樓,推土機早已準備就緒。第一次聽許志安首《流淚行勝利道》,縱然唔係好知講乜,都難免有些感觸,想起這個社區,快會改頭換尾,隨時連勝利小廚一帶自成一角的小店都趕絕殺絕,到時搵唔夠14K嘅窮人如我,真係流淚行勝利道。

推土機未殺到,勝利道小店味芳老闆就因為街坊投訴,暫停向窮人、老人家、路宿者派餐的待用餐計劃。我始知道,原來勝利道小店一直默默耕耘,但有些人潔癖發作,自覺比别人更高尚,眼不見為乾淨,竟然不喜歡樓下「多呢啲人」聚集,把長者、露宿者趕走趕盡,向店主講粗口破口大罵。

廣告

「呢啲人」,無錯是「窮人」,但都是實實在在生活喺香港,為勢所逼的香港人,如果你認為勝利道容不下,咁哪裡容得下呢?窮人無錢住呎價萬七的勝利道一號,難道就無權行勝利道?難道這些街坊就是要對無權者鞭撻,對幫助窮人小店粗口大罵,對快將摧毀社區的地產商寬容?

簡介:道德偉,貧憎一名

發表意見